Бас прокуратура алқасының отырысы туралы

Кеше алқа отырысында прокуратура органдарының бірінші жартыжылдықтағы жұмысын қорытындылап, алдағы кезеңге арналған міндеттерді анықтадық.

Жыл басынан бері Мемлекет басшысының тапсырмаларын орындау үшін біздің күш-жігеріміз "қаңтар трагедиясының" себептері мен егжей-тегжейін анықтауға, террористік актілер мен жаппай тәртіпсіздіктерді ұйымдастырушылар мен белсенді қатысушыларды анықтауға бағытталды.

Қазіргі таңда, осы оқиғаларды тергеу нәтижелері бойынша сотқа 474 қылмыстық іс жолданды, 717 адам сотталды (тәртіпсіздіктерге қатысқаны, ұрлық жасағаны, тонағаны, қаруды сақтағаны және алып жүргені үшін).

Қылмыстық процесті кезең-кезеңмен жаңғырту жүріп жатыр.

«Прокурорлық сүзгінің» арқасында сотқа дейінгі кезеңде азаматтардың конституциялық құқықтарын бұзу саны дәйекті түрде қысқарып келеді, бұған ерекше назар аударылып отыр.

Биыл біз 1077 адамға қатысты негізсіз қылмыстық қудалауды тоқтаттық. Қызметтік үй-жайлардан және уақытша ұстау изоляторларынан 512 адам босатылды.

634 адамға қатысты сот үкімі заңға сәйкес келтірілді. Бұл ретте 130 сотталған адамның жағдайы жақсарды, 15-і ақталып шықты.

Әлеуметтік-экономикалық салада прокурорлардың актілері бойынша 8 мыңнан астам заң бұзушылық жойылды.

Бюджетке 15 млрд теңгеден астам қаражат қайтарылды. 14,5 мың адам әр түрлі жауапкершіліктерге  тартылды.

Кедендік реттеу және сұйытылған мұнай-газ нарығы саласында тәртіп орнатылды. Елеулі бұзушылықтар, ұрлық жасау мен сыбайлас жемқорлықтың «көлеңкелі» схемалары ашылды.

Мүгедек адамдардың құқықтарын қорғау, медициналық бұйымдарға баға белгілеу мәселелері, ірі көтерме сауда базарларының қызметі және т. б. бойынша тексерулер жүргізілді.

184 мыңнан астам адамның еңбек құқықтары қалпына келтірілді, 1,1 млрд теңгеден астам сомаға жалақы бойынша берешек өтелді.

Азаматтық, әкімшілік және әкімшілік құқық бұзушылық туралы істер бойынша 2,1 мыңнан астам сот актілері түзетілді, 6,7 млрд теңгеге бюджет шығындарының алдын алдық.

Қадағалаудың басым бағыттарының бірі – бизнесті қорғауда маңызды нәтижелерге қол жеткізілді.

 Мәселен, кәсіпкерлік саласындағы бұзушылықтар бойынша 845 қадағалау актісі енгізілді, 212 млн теңгеден астам сомаға 5,5 мың әкімшілік шақыру алынып тасталды, 6,2 мыңнан астам заңсыз тексерулер мен бақылаудың өзге де нысандарының жолы кесілді және күші жойылды, 650-ден астам тұлға жауапкершілікке тартылды.

Заңсыз шығарылған қаржы қаражатын елге қайтару, сондай-ақ олигополиялар қызметінің жолын кесу бойынша жұмыстар жандандырылды.

Алдағы кезеңде азаматтардың құқықтарын, бизнесті және мемлекеттің мүдделерін кешенді қорғауды қамтамасыз ету, сондай-ақ қылмысқа қарсы күресте үйлестіруші рөлді күшейту бойынша жұмыс істейтін боламыз.

• 29.07.2022
• 337