Түркістан облысында «Орталық» қосалқы станциясы пайдалануға берілді

Түркістанда соңғы 4 жылда көптеген зәулім ғимараттар, мәдениет және спорттық, әлеуметтік нысандар салынып, қаланың негізгі әлеуметтік инфрақұрылымы қаланды. Аталған нысандар мен қала тұрғындарын сапалы, тұрақты электр қуатымен қамту – маңызды міндет. Сондықтан «KEGOC» АҚ тарапынан облысымызда  қуаты 220 кВ болатын «Орталық» қосалқы станциясы пайдалануға беріліп отыр. Бұл станция арқылы Түркістан қаласы мен Сауран ауданының 300 мыңнан астам тұрғыны, әлеуметтік, шағын және орта бизнес нысандары сапалы электр энергиясымен қамтамасыз етілмек.

«Түркістан қаласын сыртқы электрмен жабдықтау схемасын күшейту. Электр желілік объектілердің құрылысы» жобасын іске асыру «KEGOC» АҚ-на бекітілген болатын. Нәтижесінде  «KEGOC» АҚ құрылысты 2019-2022 жылдары жүргізіп, станцияны пайдалануға берді. Станцияда заман талабына сай озық технологиялар қолданылған. Энергетикалық нысанға «Яссы», «Солтүстік», «Коммунальная», «Сауран» қосалқы станцияларын және 50 МВт жылу энергия орталығын (ЖЭО) қосу жұмыстары жүріп жатыр. Құрылыс кезінде облыстың 100-ден астам тұрғыны жұмыспен қамтылса, қазір станцияда 10 адам тұрақты жұмысқа орналасқан.

Тұрғындарды тұрақты, сапалы электр энергиясымен қамту жұмыстары жалғасатын болады.

Станцияның ашылуына қолдау білдірген «Самұрық-Қазына» ұттық әл-ауқат қоры» АҚ, «KEGOC» АҚ басшылығына алғысымды білдіремін.

• 29.07.2022
• 233