Т. Дүйсенова СҚО тұрғындарына халықты әлеуметтік қолдау шаралары туралы айтып берді

Қазақстан Республикасының Еңбек және халықты әлеуметтік қорғау министрі Тамара Дүйсенова Солтүстік Қазақстан облысына жұмыс сапары аясында үкіметтік емес ұйымдар мен ардагерлер кеңесінің өкілдерімен, көпбалалы аналар мен мүгедектігі бар азаматтармен кездесу өткізді.  Министр балалы отбасылар мен мүгедектігі бар адамдарды әлеуметтік қолдау шаралары туралы айтып берді.

Сөзінің басында Тамара Дүйсенова 2021 жылы мемлекеттік бюджеттен төленетін зейнетақылар мен әлеуметтік жәрдемақыларға шамамен 4 триллион теңге бөлінгенін атап өтті. Зейнетақы, жәрдемақы және Мемлекеттік әлеуметтік сақтандыру қорынан төлем алушылардың саны 5,6 миллион адам. СҚО-да 179 мың азаматқа 144,5 млрд теңге мөлшерінде қаражат төленді.

Министр мемлекет балалы отбасыларды әлеуметтік қолдауға ерекше назар аударатынын атап өтті, оған бюджеттен төленетін жәрдемақылардың 5 түрі және Мемлекеттік әлеуметтік сақтандыру қорынан төленетін төлемдердің 2 түрі кіреді. Биыл бұл мақсаттарға СҚО-да 10,5 млрд теңге бөлінді, бұл өткен жылмен салыстырғанда 11,7% - ға артық.

«Жыл басынан бері Солтүстік Қазақстан облысында балалары бар 24,3 мыңнан астам отбасы жалпы сомасы 6,1 млрд теңгеге жәрдемақы мен төлемдер алды», – деп хабарлады министр.

Тамара Дүйсенова арнайы әлеуметтік қызметтер жүйесі және мүгедектігі бар адамдарды әлеуметтік қолдау шаралары туралы да  айтып берді.

Мүгедектігі бар адамдарды техникалық құралдармен және оңалту қызметтерімен қамтамасыз ету қазір Әлеуметтік қызметтер порталы арқылы жүзеге асырылады. Порталда мүгедектігі бар адамдар оңалтудың техникалық құралдарын, санаторлық-курорттық емдеу, жеке көмекшінің, ымдау тілі маманының қызметтерін және оларды жеткізушілерді өз бетінше таңдай алады.

«Әлеуметтік қызметтер порталын іске қосу: оңалту құралдары мен қызметтерімен қамтамасыз ету уақытын 8 айдан 2 аптаға дейін қысқартуға; мүгедектігі бар адамдарға көрсетілетін қызметтер мен оңалтудың техникалық құралдарын таңдауды өнім берушіден жеке қажеттіліктерін, сапасын, беделін және басқа пайдаланушылардың пікірлерін ескере отырып, тікелей ұсынуға; мүгедектігі бар адамдардың қай жерде орналасқанына қарамастан, оңалту құралдары мен қызметтерін таңдауына мүмкіндік береді. Мысалы, санаторийді ауруына байланысты басқа аймақтан таңдауға болады.

2022 жылғы 1 тамыздағы жағдай бойынша Солтүстік Қазақстан облысы бойынша оңалтудың жеке бағдарламаларының орындалуы 75,4%-ды құрады, бұл республикалық көрсеткіштен жоғары. Жалпы, жыл басынан бері Портал арқылы өңірде азаматтар 4 969 оңалтудың техникалық құралдарын алды. Ымдау тілі маманының қызметін – 214 адам, жеке көмекшінің қызметін – 297 адам, санаторлық-курорттық емдеуді – 309 азамат алды», – деп атап өтті Тамара Дүйсенова.

Министр сондай-ақ кездесуге қатысушыларды Қазақстанның барлық өңірінде мүгедектікті сырттай белгілеу пилоттық режимде енгізілгені туралы хабардар етті. 

«Мүгедектікті сырттай белгілеу тетігі бүкіл процесті түбегейлі өзгертеді және куәландырылатын адамның тұрғылықты жері бойынша медициналық ұйымға ғана жүгінуін көздейді. Денсаулық жағдайы туралы ақпарат және азаматтың тыныс-тіршілігінің бұзылу дәрежесі туралы дәрігерлердің қорытындылары медициналық ақпараттық жүйелер арқылы Еңбек министрлігінің орталықтандырылған деректер базасына түседі. Сол жерден, жеке деректерді көрсетпей, ақпарат бұрынғыдай тұрғылықты жері бойынша емес, үш аймақтың тиісті сараптамалық комиссияларына автоматты түрде жіберіледі. Олардың қорытындылары негізінде объективті шешім шығарылады. Бұдан әрі мүгедектік, оңалтудың техникалық құралдары және оңалту қызметтері бойынша жәрдемақы проактивті түрде, яғни азаматтың түрлі инстанцияларға жүгінуін қажет етпей тағайындалады», – деді Тамара Дүйсенова. Биыл СҚО-да сырттай форматта 1 мыңнан астам өтінім қаралған.

Кездесу барысында министр қазақстандықтарды зейнетақымен қамтамасыз ету мәселелеріне ерекше назар аударды. Оның айтуынша, бүгінгі таңда республикада 2,2 млн зейнеткер бар, оның ішінде Солтүстік Қазақстан облысында 100,8 мың адам (4,5%).

Былтырмен салыстырғанда биыл ынтымақты зейнетақы мөлшерінің өсуі 11% - ды, базалық зейнетақының өсуі – 9% - ды құрады. СҚО-да зейнеткерлердің 82% жоғары және орта деңгейде зейнетақы алады. Облыс бойынша зейнетақының орташа мөлшері 106,9 мың теңгені құрайды.

• 12.08.2022
• 266