Жетісайдың даму қарқыны назарда тұр

Бүгінгі Жетісай ауданы тұрғындарымен кездесуде халықтың ұсыныстарын тыңдап, жеке мәселелері бойынша да қабылдау өткіздім. «Нұралы жол-Ж» шаруа қожалығының шаруаларымен кездесіп, егістікті әртараптандыру, ағын суды үнемдеу, тамшылатып  және жаңбырлатып суғару технологиясын кеңінен енгізу жөнінде сөз қозғадық.

Алдыңғы кездесулерде көтерілген өзекті мәселелер шешімін табуда. Биыл сәуірде жетісайлықтармен кездесіп, тұрғындарды толғандырып жүрген әлеуметтік және басқа да өзекті мәселелерді талқылаған едік. Жалпы халықпен кездесу мен жеке қабылдау барысында 30-дан аса мәселе көтерілді. Оның басым бөлігі өз шешімін тапты. Жетісай қаласындағы 5 қабатты 6 тұрғын үйдің ауласын абаттандыру үшін қаржы бөлінді. Биыл құрылыс жұмыстары басталады. Ж.Ералиев ауылдық округінің елді мекендерінің ауыз су жүйелері мен су өлшеу шкафтарын, Ғ.Мұратбаев елді мекенінің ауыз су жүйелерін ағымдағы жөндеу жұмыстарына тиісті қаржы қарастырылып, жұмыс басталып кетті. Жылы су ауылдық округіне қарасты облыстық маңызы бар КХ – 9 автомобиль жолының бойынан ұзындығы 1,6 шақырымды құрайтын аяқ жол салу жұмыстары жүріп жатыр. Қыркүйекте жол тапсырылады. Республикалық бюджеттен Қарақай ауылдық округінде «Жетісай» газ тарату стансасын (АГТС) салу үшін тиісті қаржы бөлінді.

Қазір Жетісай ауданында 4 мектептің, Жетісай қаласында 5 тұрғын үйдің құрылысы, 80 га жер теліміне газ және кәріз жүйесін тарту жұмыстары жүруде.

Кездесуде айтылған әрбір ұсыныс назарға алынып, заң аясында жұмыс жүргізіледі.

• 12.08.2022
• 302