Түркістан облысында мал азығынан тапшылық болмайды

Бүгін өткен апталық мәжілісте ауыл шаруашылығы саласындағы жұмыстар барысы мен өзекті мәселелер туралы сөз қозғадық.

Биыл ауыл шаруашылығы саласында көрсеткіш жоғары. Жетістіктер жылы болып тұр. Көп жұмыс атқарылды. Бұл – осы саладағы азаматтардың, халықтың еңбегінің жемісі. Енді осы жетістікке жету жолын үйрету үшін шаруаларды жинап, семинар өткізу керек. Көкөніс, бидайға қатысты семинар өткізіп, тәжірибемен бөліскен жөн. Егістік басына апарып, техникалар мен технологияларды көрсету арқылы жұртшылықты ауыл шаруашылығына қызықтыра аламыз.

Биыл «Бір алқаптан жылына 2-3 өнім алу» жобасы бойынша 8,4 мың гектарда 3000 жоба іске асырылды. Сондай-ақ биыл мақта дақылы 126,3 мың гектарға егіліп, жалпы 345 мың тонна шитті мақта жиналады деп жоспарлануда. Мақта бағасы өткен жылы 320-380 теңге аралығында болса, биыл келісі 400 теңге көлемінде болады деп күтілуде.

Жалпы биыл мемлекет тарапынан күзгі жиын - терім жұмыстарына 48 мың тонна жанар-жағар май бөлініп, агроқұрылымдарға литрі 200-202 теңгеден берілуде. Бұл – нарықтық бағадан 15-20% төмен. 522 түрлі минералды тыңайтқыштардың құнын 50%-ын субсидиялауға бюджеттен қаржы бөлінді.

Биыл Түркістан облысында мал азығынан тапшылық болмайды. Аймақты 1,5 жылға жететін мал азығы қорымен қамтамасыз етуге мүмкіндік бар. Малазықтық шөптер биыл шаруаларға қол жетімді бағада сатылуда. Егістік алқап басынан табиғи шөптер прессі 350-400 теңге, жоңышқа 600-700 теңге. Былтыр 1200-1500 теңге аралығында саудаланған болатын.

• 22.08.2022
• 107