Ұстаздарға жаңа Түркістанды таныстырдым

Бүгін Түркістан қаласына тамыз кеңесіне келген өңіріміздің үздік ұстаздарымен кездестім. Ұлағатты жандармен бірге балаларды дамытуға ықпал жасайтын оқу - ағарту ошақтарына, білім ордаларына, қосымша білім беру, спорт нысандарына, қаланың рухани-мәдени орындарына экскурсия жасадық.  Ұстаздарымызды атқарылған жұмыстармен және жобалармен таныстырдым.

 «Farab» кітапханасын салуда әлемнің дамыған елдерінің озық үлгілерін қолдандық. Мұнда жастар тек кітап оқып қана қоймай, шығармашылықпен айналысады. Ізденеді. «Fablab» шеберханасында оқушылар өз қолдарымен роботар, түрлі дүниелерді жасап шығарады. Осындай шеберханаларды барлық аудан, қалада ашуды жоспарлап отырмыз. Кітапханада Түркістанның тарихымен танысуға мүмкіндік бар. Түркістанның бірінші құндылығы – Қожа Ахмет Ясауи. Оның тарихи тұлғасы мен ілімі. Исламдағы орны. Жалпы қазақтың тарихында Ясауидің орны ерекше. Мемлекеттіліктің дамуына өз ізін қалдырған. Ұстаз болған тарихи тұлғаны халық айрықша жақсы көрген. Екінші құндылық – Қожа Ахмет Ясауи кесенесі. Бұл кесене – сәулет өнерінің жауһары. Бұған теңдес мавзолей әлемде жоқ деуге болады. Әрбір кірпіші есеппен қаланған. Өкінішке қарай, біз Ясауидің болмысын, оның рухани байлығын әлі толық білмейміз. Терең зерттелмеген. Сондықтан біз 26-28 қазан аралығында Түркістанда «Ескерткіштерді қорғайтын халық»  атты  халықаралық ғылыми конференция өткіземіз. Онда Ясауидің мұрасы мен тұлғасы және кесенесі туралы тың деректер айтылады. Зерттеледі. Шетелден тарихшылар келеді. Ұстаздарды осы іс-шараға қатысуға шақырамыз.

Облыс бойынша 2025 жылға дейін «Оқуға құштар мектеп» жобасы аясында 324 мектептің кітапханаларын жаңғырту жоспарланған. Түркістан мен Кентау қалаларында «Математикаға дайындықтың жаңа технологиясы» бағдарламасын енгізу жоспарлануда. Бұл бағдарламада мұғалімдер РФММ, «Қазақ-Британ» технологиялық университетінің әлеуетін пайдаланатын болады. Сонымен қатар НЗМ тәжірибесін таратуда маңызды бастамалар қолға алынады. Техникалық және кәсіптік білім беру саласын дамыту мақсатында колледж басшыларының жұмыстарын бағалайтын КРІ жүйесі енгізіледі, оның ішінде өндіріс орындарымен бірлесе отырып кіші кәсіпорындар құру, бизнес-инкубаторлар ашу, педагогтардың сапалық құрамын арттыру, түлектердің жұмысқа орналасу көрсеткіштерін жоғарылату шаралары қамтылмақ.

• 24.08.2022
• 313