Стресс активтері туралы Заң

Құрметті қазақстандықтар!

2022 жылғы 4 шілдеде Мемлекет басшысы «Қазақстан Республикасының кейбір заңнамалық актілеріне стрестік активтер нарығын дамыту мәселелері бойынша өзгерістер мен толықтырулар енгізу туралы» Қазақстан Республикасының Заңына қол қойды.

Заң стрестік активтердің өтімді нарығын нарықтық қағидаттармен дамыту және стрестік активтерді экономикалық айналымға тартуды жеделдету үшін қажетті жағдайлар жасауға бағытталған.

Заңның нормалары алғашқы ресми жарияланған күнінен кейін күнтізбелік 60 күн өткен соң, яғни 2022 жылғы 5 қыркүйектен бастап қолданысқа енгізіледі.

Заң «Егемен Қазақстан» №126 (30355), 05.07.2022ж., «Казахстанская правда» №126 (29753), 05.07.2022ж. газеттерінде және ҚР НҚА эталондық бақылау банкінде электрондық түрде 07.07.2022ж. жарияланды.

Заңда жеке инвесторларды қосу арқылы стрестік активтерді уәкілетті сатып алушылардың қолданыстағы тізімін кеңейту көзделеді.

Бұл ретте қарыз алушы-жеке тұлғалардың құқықтарын қорғау үшін стрестік активтерді сатып алуға құқығы бар тұлғалардың тізімін кеңейту заңды тұлғаларға берілген проблемалық қарыздарға және кәсіпкерлік қызметті қаржыландыру үшін жеке тұлғалардың проблемалық қарыздарына ғана қатысты болады. Яғни, Заңда жеке тұлғалардың кредиттерін жеке инвесторларға сату көзделмеген.

Инвесторларға жұмыс істемейтін кредиттерге қызмет көрсету және оларды басқару жөнінде қызмет көрсететін сервистік компаниялар құру көзделеді. Сервистік компаниялардың қызметін енгізу жеке инвесторларға жұмыс істемейтін кредиттерді сату кезінде маңызды болып табылады, себебі бұл компаниялардың проблемалық қарыз алушылармен жұмыс істеу бойынша тиісті жұмыс тәжірибесі мен құзыреті болады.

Сервистік компаниялар активтерді сенімгерлікпен басқаруды жүзеге асырады, жеке өндіріп алу стратегияларын әзірлейді және іске асырады және стрестік активтердің иелеріне басқа да қызметтер көрсетеді.

Сервистік компаниялардың функцияларын банктердің стрестік активтерін басқаруды жүзеге асыратын еншілес ұйымдарына және тиісті тәжірибесі мен құзыреті бар коллекторлық агенттіктерге беру ұсынылады. Агенттік белгіленген талаптарға сәйкес келетін сервистік компаниялар тізілімін жүргізіп, олар туралы ақпаратты өзінің интернет-ресурсына орналастыратын болады. Бұл қарыз алушылардың құқықтарын қорғаудың қосымша тетігін қамтамасыз етуге мүмкіндік береді, себебі көрсетілген ұйымдар Агенттіктің реттеу аясында.

Тағы бір басым міндет стрестік активтерді сату үшін толыққанды инфрақұрылым құру және стрестік активтерді сатып алу мен сатудың қайталама нарығын қалыптастыру болып табылады.

Ол үшін Агенттік Еуропа Қайта құру және Даму Банкінің техникалық қолдауымен Ұлттық Банкпен және Қазақстан Республикасының Үкіметімен бірлесіп барлық мүдделі инвесторлар мен стрестік активтерді ұстаушылар үшін ашық қолжетімділікті қамтамасыз ететін стрестік активтерді сатып алу және сату жөніндегі бірыңғай платформаны құру жөніндегі жобаны іске асыруда.

2022 жылдың соңына дейін электрондық платформаның операциялық моделі және оның кейіннен жұмыс істеуіне техникалық сүйемелдеуді жүзеге асыратын оператор-ұйым айқындалатын болады. Бұдан басқа, электрондық платформаны құру үшін қажетті заңнамалық өзгерістер айқындалатын болады.

Стрестік активтерді сатып алу және сатудың бірыңғай платформасы нарықтың ашықтығын арттыруға, стрестік активтерді сатып алуға мүдделі инвесторлар базасын кеңейтуге, сондай-ақ стрестік активтерді сатып алу мен сатудың қайталама нарығын қалыптастыруға мүмкіндік береді.

• 01.09.2022
• 362