Түркістаннан Қостанайға 72 тонна гуманитарлық көмек жөнелтілді

Түркістан облысы әкімдігінің қолдауымен және «Жастар ресурстық орталықтарының», «AMANAT» партиясы Түркістан өңірлік филиалының ұйымдастыруымен Қостанайдағы апатқа байланысты 72 тоннадан астам гуманитарлық көмек жөнелтілді. Азық-түлік өнімдері, ауыз су, жеке гигиеналық заттар және төсек жабдықтары Мақтаарал ауданы, Арыс және Түркістан қалаларында және өзге аудандарда орналасқан қабылдау пункттерінде жиналған.

Өңірдегі «Жастар ресурстық орталықтарының» ұйымдастыруымен жеке кәсіпкерлер мен қарапайым азаматтардың, шағын бизнес өкілдерінің демеушілігімен жиналған қажетті заттар ішінде 3,4 тонна ұн, 1500 келіге жуық макарон өнімдері, 70 қап картоп, 500 келіге жуық күріш, 1000 литрден аса пісте май, 900 консервіленген банка және өзге де азық-түлік пен тұрмысқа қажетті заттар жолға шықты.

Гуманитарлық көмекке бірқатар мекемелер де өзіндік үлесін қосты. Атап айтқанда, Қ.А.Ясауи атындағы халықаралық қазақ-түрік университетінің ректоры Жанар Темірбекова бастаған қолдау тобы 400 дана көрпе-төсек жеткізді. Сондай-ақ 500 мұғалім 1 күндік жалақыларын «Biz birgemiz»  қорына аударды. Түркістан облыстық Қазақстан халқы Ассамблеясы мүшелері де киім-кешек, азық-түлік тауарлары және жеке қолданысқа қажетті заттармен толықтырды. Түркістан облысы әкімдігінің қызметкерлері де бір күндік жалақыларын аударды. Біз – Қостанаймен біргеміз!

• 06.09.2022
• 229