Түркістанда спортты дамытуға барлық жағдай жасалады

Түркістанда бой көтеріп жатқан барлық ғимараттар қаланың көркін ашып қана қоймай, көне шаһардың тарихи келбетін сақтай отырып салынуда. Әрі заманауи архитектураның озық жетістіктері пайдаланылады. Бүгін облыс орталығындағы бірқатар спорт кешендерін аралап, жұмыс барысын бақыладым. Түркістанда Орта Азияда баламасы жоқ спорттық кешендері бар ескек есу каналы құрылысының екінші кезеңі басталады. Енді мұнда әкімшілік ғимараты, қонақүй, веложол, бассейн, қайық тұрақтары, жазғы кинотеатр, аралды қосатын көпір мен басқа да нысандар бой көтереді. Олимпиадалық орталық сәулеттік көркімен ғана емес, қаланы көгалдандырып, туризмді дамытуға және өңірдің атмосферасын өзгертуге де мүмкіндік бермек. Мұндай заманауи спорт кешендері елімізде көп емес. Біз халықаралық ескек есу каналының мүмкіндігін толық пайдаланып, жастарды спортқа баулуымыз керек. Спорт — ел абыройын асқақтату тетігі ғана емес, ол — денсаулық кепілі. 
Түркістан қаласында, сондай-ақ, 1200 адамға есептелген «Мұз сарайының» құрылысы жүруде, «Теннис орталығы», Олимпиадалық резерв мектебінің әкімшілік ғимараты мен жатақханасы, Б.Саттарханов спорт кешені, «Ат спорты кешені» секілді жаңа спорт нысандары ашылады. Өңірде спорт саласын дамытуға барлық жағдай жасалады.
Сонымен қатар қалалық саябақ ішінен салынып жатқан жасанды көлдің құрылыс алаңында болдым. Демалыс аумағы келер жылы пайдалануға беріледі.

• 19.09.2022
• 262