Активтерді қайтару жөніндегі комиссияның жұмыс тобының отырысы туралы

Ағымдағы жылғы 16 қыркүйекте Бас прокуратурада Экономикалық ресурстардың заңсыз шоғырлануына қарсы іс-қимыл мәселелері жөніндегі комиссияның жұмыс тобының кезекті отырысы өтті.

Жиында «ҚазМұнайГаз» ҰК АҚ, «Қазақстан темір жолы» ҰК» АҚ және «QazaqGaz» ҰК»АҚ ұлттық компанияларының басшыларымен бірлесіп,  мұнай өнімдерінің айналымы, сұйытылған мұнай газы және оларды тасымалдау мәселелері қаралды.

Елімізде отын-энергетика кешені мен көлік нарықтары монополияландырылғаны ескерілді. Бұл бәсекелестердің қолжетімділігін шектеуге, түпкі өнімге жоғары маржа белгілеуге және үстеме табыс алуға жағдай жасайды.

Осыған байланысты Комиссия олигополия субъектілерінің монополиялық жағдайын белгілеуге және бәсекелестікті шектеуге әсер еткен шешімдерге талдау жүргізеді.

Квазимемлекеттік сектормен бірлесіп, бірыңғай іс-қимылдар алгоритмін пайдалана отырып, тауар нарықтарын монополиядан арылту, ұлттық компаниялар мен оның еншілес құрылымдарының заңсыз шығарылған активтерін қайтару бойынша жұмыс жүргізіліп жатыр.

Кездесу қорытындысында осы жұмыстың тиімділігін арттыруға бағытталған қосымша құқықтық, ұйымдастырушылық және техникалық шаралар кешені әзірленді.

• 19.09.2022
• 237