Ел Президенті Түркістанды дамыту жұмыстарын жалғастыруды тапсырды

Мемлекет басшысы Қасым-Жомарт Тоқаевтың қабылдауында болып, Түркістан облысының әлеуметтік-экономикалық жағдайын және қолға алынған жаңа жобалар бойынша баяндап бердім.  
Өңірімізде биылғы 8 айдағы жалпы өңірлік өнеркәсіп өнімінің көлемі 534 миллиард теңгеге жетіп, 2021 жылдың осы кезеңімен салыстырғанда 125 миллиард теңгеге өскен. Облыста жалпы құны 12,7 миллиард теңгені құрайтын 26 инвестициялық жоба іске қосылып, 936 жұмыс орны ашылды. Ауыл шаруашылығы саласында 477 миллиард теңгенің өнімі өндіріліп, былтырмен салыстырғанда көрсеткіш 4 пайызға артты. Түркістан аумағында бірқатар су нысандарына жөндеу жұмыстары жүргізілді. Жоспардағы шаралар іске асырылғаннан кейін ауыл шаруашылығының жалпы өнім көлемі 1 триллион теңгеге жетеді. Сондай-ақ жыл басынан бері 486 мың шаршы метр тұрғын үй пайдалануға берілген. Жыл соңына дейін жалпы 85 тұрғын үйдің құрылысын аяқтау жоспарланып отыр. Бюджет есебінен 59 мектептің құрылысы жүргізілуде. Биыл 4 апатты және 2 үш ауысымды мектептің мәселесі шешілетін болады. Бұдан бөлек, жеке инвесторлар есебінен 13 мектеп пайдалануға берілді. 
Мемлекет басшысы Қасым-Жомарт Тоқаев нақты тапсырмалар берді. Түркістан облысында қолға алынған жобаларды жалғастыруды және халықпен тығыз жұмыс істеу мәселесін күшейтуді тапсырды. Ауылды дамытуға басымдық беріледі. Түркістан облысы тұрғындарының әл-ауқатын жақсарту – басты назарда.

• 26.09.2022
• 200