Өздеріңіз білетіндей, осыдан 3 ай бұрын Атырау облысына іс-сапармен барып, шалғайдағы елді-мекендердің тұрғындарымен кездескен болатынмын

Өздеріңіз білетіндей, осыдан 3 ай бұрын Атырау облысына іс-сапармен барып, шалғайдағы елді-мекендердің тұрғындарымен кездескен болатынмын. Аймақтағы қордаланған мәселелерді талқылап, жол жөндеу жұмыстарының барысы туралы әңгімелестік. Сондай-ақ жергілікті тұрғындардың талап-тілектерін тыңдап қайтқан едім.  
 
Азғыр өңіріндегі жергілікті маңызы бар жолдың ахуалы төңірегінде сөз қозғаған азаматтар жолдың сапалы салынуы үшін тиісті шара қабылдауымды сұрады. Өз кезегімде аталған мәселені жеке бақылауыма алып, ғалымдармен бірлесе ғылыми тұрғыда климаттық ерекшелікті ескере отырып, жол салу технологиясын қайта қарайтынымызды айттым.
 
Шынымен-ақ, аталған өңірдегі автомобиль жолы бесінші категорияға жатады. Азғыр аймағы Нарын құмында орналасқандықтан, мұндағы жол учаскелерінде құм, саз және сор кездеседі. Жергілікті тұрғындарды да «жол құрылысы кезінде өңірдің топырақ ерекшелігі неге ескерілмейді», «ертең бұл жолдан ештеңе қалмайды» деген мәселелер алаңдатады.
 
Енді, міне, менің тапсырмам бойынша жол ғылыми-зерттеу институтының ғалымдары Атырау облысындағы аймақтық маңызы бар жолдардың құрылысында жергілікті материалдарды пайдаланудың жаңа технологиясын әзірлеп жатыр. Аталған технологияны алғаш рет Азғыр өңіріндегі автомобиль жолын орташа жөндеу жұмыстарында қолдануды жоспарлап отырмыз.
 
Қазақстан жол ғылыми-зерттеу институты «7 разъезд–Үштаған–Асан–Азғыр–Балқұдық–Сүйіндік» автомобиль жолының техникалық жай-күйін зерделеді. Автожолдың жөнделетін учаскесі құрғақ даланың климаттық аймағында орналасқан. Бұл ретте органикалық емес байланыстырғыштар мен топырақ тұрақтандырғыштарын қолдана отырып, топырақты кешенді нығайту ұсынылады, бұл өз кезегінде беріктік пен аязға төзімділікті қамтамасыз етеді.
 
Ендігі кезекте жаңа технологияларды енгізу нәтижелі болып жатқан жағдайда, бұл әдіс өңірдегі өзге де жол жөндеу жұмыстарында қолданылатын болады.

• 28.09.2022
• 293