"Ұлы дала жорығы" бәйге-марафонының жеңімпазы мен жүлдегерлері Түркістанда анықталды

Қазақстанда тұңғыш рет ұйымдастырылған «Ұлы дала жорығы» республикалық бәйге-марафоны Елордамыз Астанадан бастау алып, қасиетті қаламызда мәресіне жетті. 
Мемлекет басшысы Қасым-Жомарт Тоқаев Түркістан облысына жасаған жұмыс сапарында және марафон-бәйгенің ашылу рәсімінде жолдаған құттықтау хатында бұл шараның маңыздылығын атап өтіп, ұлттық спортты жаңғырту арқылы рухани серпіліс әкелу басты мақсат екенін айтқан болатын. 
Кеше қазақ руханияты мен спорты үшін аса маңызды жиында бас қосып, 1200 шақырымды 11 күнде бағындырған мықтыларды Түркістан төрінде елмен бірге  құрметпен қарсы алдық.
Бұл – Түркістан өңірі үшін үлкен құрмет әрі мәртебе. Жалпы соңғы уақытта Түркістан қаласы жаңа қарқынмен дамып, жаңа спорттық нысандар көптеп бой көтеруде. Осы арқылы өңірде спортшы жастар, чемпиондар көбейеді деген сенім мол. Дүбірлі додаға 19 өңірден 19 команда қатысты. Түркістан облысының атынан шыққан «Теріскей» командасының жігіттері үздіктер қатарынан табылып, ІІІ орынды қанжығалады. Екінші орынды Жетісу өңірі алса, бірінші орынға Маңғыстаудың шабандоздары шықты. Екі аптадай үздіксіз жортып, қиындықтарға мойымаған шабандоздарға айрықша алғыс айтамын. Өйткені біздің атбегілеріміз бен шабандоздарымыз 1200 шақырымды басып өтіп, ерлік жасап отыр. 
Ұлттық құндылықтарымызды дәріптеп, қазақты ат спортына жетелейтін осындай жобалар жалғасын таба берсін. Азаматтарымыз аттан түспесін! Халқымыздың мәртебесі биіктей берсін!

• 30.09.2022
• 399