Осы аптада жеке мәселелерімен келген азаматтармен кезекті рет кездестім

Осы аптада жеке мәселелерімен келген азаматтармен кезекті рет кездестім. Бұл жолы қабылдауға Астана, Алматы, Атырау, Шымкент қалалары мен Ақмола және Түркістан облыстарының тұрғындары келді. Олар өздерінің ұсыныстарын алға тартып, көкейлерінде жүрген сауалдарын қойды.

Кездесу барысында бірқатар маңызды мәселе көтерілді. Атап айтқанда, Түркістан облысынан келген Т.Қожакелдиев жылыту радиаторларын өндіру жобасын жүзеге асыру үшін арнайы грант алуға қатысты сауалын қойды. Ал Б. Алшынбаев есімді елорда тұрғыны жалға берілетін тұрғын үйлер құрылысының жоспарына қатысты және бұған дейін осы бағдарлама арқылы салынған пәтерлер нақты кімдерге берілгені туралы сұрағын жолдады. Ақмола облысына қарасты Талапкер ауылының тұрғындары инфрақұрылымды дамыту және аталған елдімекендегі тұрғын үй-коммуналдық шаруашылыққа қатысты мәселелерді көтерді.

Қоғамдық қабылдау барысында айтылған ұсыныстар жіті назарға алынатынын жеткізіп, өтініштер мен сауалдарға егжей-тегжейлі жауап бердім. Кездесуде көтерілген мәселелер бойынша құрылымдық бөлімше басшыларына тапсырмалар беріп, бірқатарын жеке бақылауыма алдым.

Осы орайда мұндай кездесулерден бөлек, қоғаммен конструктивті байланыс әлеуметтік желілер арқылы да орнатылғанын айта кеткім келеді. Күн сайын  direct-ке өңір тұрғындарынан көптеген хаттар келіп түседі. Оларға мүмкіндігінше жауап беруге тырысамын. Жедел әрекет етуді қажет ететін мәселелерді жылдам шешуге барынша тырысамыз. Сауалдардың басым бөлігі автокөлік жолдарының бүгінгі ахуалы, тұрғын үй құрылысы, инфрақұрылымды дамыту және өзге де мәселелер төңірегінде.

Аталған форматтағы кездесулер ай сайын тұрақты түрде өткізіліп тұрады. Тағы бір айта кетерлігі, қабылдауға кез келген азаматтың жазылу мүмкіндігі бар. «Халық үніне құлақ асатын мемлекет» тұжырымдамасы шеңберінде бұл үрдісті одан әрі жалғастыра беруге ниеттімін.

• 04.10.2022
• 279