Азаптауларға қарсы іс-қимыл мәселелері туралы

Мемлекет басшысы Қазақстан халқына Жолдауында азаптаулармен байланысты қылмыстарды тергеп-тексеруде жүйелі тәсілді енгізу және осы функцияны Бас прокуратураға бекіту туралы тапсырма берді.

Азаптауларға қатысты қылмыстар үшін жазаны күшейтетін заң қабылданды. Бас бостандығынан айырудың ең ұзақ мерзімі 10 жылдан 12 жылға дейін ұзартылды.

Рақымшылық, ескіру мерзімі және тараптардың өкінуі мен татуласуы негізінде азаптаулар бойынша қылмыстық жауаптылықтан босату жойылды.

2019 жылдан бастап Бас Прокурордың «Пенитенциарлық жүйеде азаптаулар, суицид және дене мүшелерін зақымдау фактілерін тергеп-тексеруді ұйымдастыру туралы» нұсқауы қолданылады, оған сәйкес прокурор оқиға орнына міндетті түрде баруы тиіс.

Түзеу мекемелеріне және қылмыстық қудалау органдарына үздіксіз бейнебақылау енгізу жүргізілуде.

Ел Президентінің тапсырмасын орындау үшін Бас прокуратура азаптаулардың тергеулігін түбегейлі прокуратура органдарына белгілеу туралы қылмыстық-процестік кодексіне түзетулер жобасын дайындады, ол  Парламенттің қарауында.

Азаптауларды тергеп-тексеруге дайындық шеңберінде а.ж. 29 қыркүйекте прокуратура органдарының қызметкерлері үшін «Азаптауларға қарсы іс-қимылдың өзекті мәселелері» атты тақырыпта семинар өтті.

Семинар жұмысына Адам құқықтары жөніндегі ұлттық орталықтың, Адам құқықтары жөніндегі қазақстандық халықаралық бюроның, Азаптауларға қарсы коалицияның өкілдері, Құқық қорғау органдары академиясының сарапшы-психологтары мен ғалымдары қатысып, сөз сөйледі.

Шара барысында азаптауларға қарсы іс-қимылдың ұлттық және халықаралық тетіктері, Қазақстан қосылған халықаралық Конвенциялар, сондай-ақ азаптауларды тергеп-тексеру кезінде туындайтын проблемалық мәселелер мен оларды шешу жолдары талқыланды.

• 05.10.2022
• 255