Сарыағаш ауданы тұрғындарымен кездестім

Тұрғындардың өтініштері мен ұсыныстарын тыңдау, өткір мәселелерді талқылау мақсатында жоспарға сәйкес Сарыағаш ауданынан арнайы барып, жергілікті халықпен кездестім. Айтары бар азаматтардың ұсыныстарын тыңдадым. Ел инфрақұрылым, мектеп салу және өзге де мәселелерді көтерді. Айтылған мәселелердің барлығы орынды. Соның ішінде халықты жұмыспен қамтамасыз ету – атқарушы биліктің, яғни біздің міндетіміз, Мемлекет басшысының бізге берген тапсырмасы.

Сарыағаш ауданының әлеуметтік-экономикалық дамуына ерекше көңіл бөлінген. Суы шипалы, елі еңбекқор Сарыағаштың болашағы жарқын. Ауданды дамыту жұмыстары жалғасады.

Халықпен жүздесулерде көтерілген мәселелер шешімін тауып келеді. Аудандағы Жібек жолы ауылдық округінің Дихан баба елді мекенінде кітапхана және мәдениет үйін салу мақсатында қажетті 340,4 млн. теңге қаралып, құрылыс жұмыстары басталып кетті. Көктерек кентінде қыркүйек айынан бастап ескірген электр желілері мен бағаналарын жаңарту жұмыстары жүргізілуде. Сарыағаш ауданында  7 мектептің құрылысы басталып, биыл 4 мектеп пайдалануға берілмек. Ауданда 3 дәрігерлік амбулатория салынуда. 8 елді мекенді ауыз сумен қамту жұмыстары жүргізілуде.

Тұрғындармен кездесуден кейін жеке қабылдау өткіздім. Кездесуде және жеке қабылдауда көтерілген әр мәселе хаттамаға енгізіліп, тиісті жұмыстар жүргізіледі.

Сарыағаш ауданындағы іссапарымда  бірқатар өндіріс орындарында болып, жұмысымен таныстым. «Бес қара» құс фабрикасында 400 мыңға жуық Коралл-кросс тұқымды құсы өсіріледі. Тәулігіне 300 мың жұмыртқа шығарады. Жібек жолы ауылдық округіндегі ерте көктемгі дақылдардың көшеттерін дайындаумен айналысатын «Agro Tur» шаруа қожалығында жылына 12 млн. түп көшет өсіріледі. Соңғы үлгідегі автоматтандырылған мұндай өндіріс орны еліміз бойынша алғаш рет Сарыағаш ауданында ашылған. Біз кәсіпкерлікке қолдауды күшейтеміз. Мемлекет экономикасының күретамыры – өндіріс және кәсіпкерлік.

Сарыағаш ауданын дамыту бағытындағы жұмыстарды әрі қарай жаңа қарқынмен жалғастырамыз.

• 07.10.2022
• 284