Ауыл шаруашылығы саласын Келес ауданының брендіне айналдыруға болады

Тұрғындармен кездесу Келес ауданында жалғасып, келестіктердің талап-тілектерін тыңдадым.

Осыған дейінгі кездесулерде тұрғындар көтерген мәселелердің басым бөлігі шешімін тапқан. Мәселен, Абай ауылынан тұрғын үй құрылысын жүргізуге жер учаскелерін беру үшін 96 гектар жерге электрмен жабдықтау желілерімен қамтамасыз ету жұмыстары жүргізілуде. Кезекте тұрған 500-ге жуық азаматқа кезең-кезеңімен жер учаскесі беріледі. «Ақылбексай» су қоймасынан ауылға су беру мәселесі бойынша қажетті жұмыстары жүргізіліп, жыл соңына дейін аяқталмақ. Мемлекет басшысының тарапынан қойылған міндеттер еліміздің экономикалық өсімін жеделдетіп, халықтың өмір сүру сапасы мен әл-ауқатын жақсартуда маңызды рөл атқаратыны сөзсіз. Халықтың табысын арттыруға бағытталған жұмыстар да ары қарай жалғасын табатын болады. Мемлекет басшысы Қасым-Жомарт Тоқаев атап өткендей, Қазақстанның шынайы жаңару кезеңіне сәтті қадам басуы жолында алдымызға қойылып отырған тапсырмалар мен міндеттерді бүкіл қоғам болып жұмыла атқаруымыз маңызды.

Ауыл шаруашылығы саласын Келес ауданының брендіне айналдыруға болады. Өйткені мұнда егін, мал шаруашылығын дамытуға барлық мүмкіндік бар. Осында өстік, бала кезде таңғы 7-ден бастап малға су беріп, қораны тазалап, бақшамызда түрлі дақылдар егіп өстік. Бір жылда 2-3 өнім алынатын. Осы үрдіс жалғасуы тиіс. Ауыл шаруашылығын дамытуға қатысты жобаларды толық қолдаймын. Ордабасы ауданында ірі мал шаруашылығы кешенін ашуды жоспарлап отырмыз. Келесте де салуға болады. Мал шаруашылығымен айналысатын 25 шаруа қожалығы мен кәсіпорындардың тізімі бекітіліп, Өзбекстан Республикасына ет экспорттауға рұқсат алынды. Келестік шаруаларды да осы тізімге қосып, ет экспортын ұлғайтуға мүмкіндік мол. Спорт кешенін, Оқушылар сарайын, кітапхана салу мәселесін де қарастырамыз. Жалпы өңір тұрғындарының 80 пайызға жуығы ауыл-аймақтарда тұрады. Сондықтан енді аудандарға қолдау күшейтіледі.

Тұрғындармен кездесуден соң, жеке қабылдау өткіздім. Бірде-бір мәселе назардан тыс қалмайды.

Келес ауданына жұмыс сапарымда кәсіпорындарға барып, жай-күйімен таныстым. Ораз ата елді елді мекенінде орналасқан «Келес Пласт» ЖШС қайта өңдеу цехында шаруалар арасында сұранысқа ие жылыжай шаурашылығына қажетті заттар шығарылады.

Біртілек ауылдық округі аумағында орналасқан «Оразов Ермахан» шаруа қожалығында ашық егістік жерден жылына 2-3 рет көкөніс өсіретін және жылыжайда бір жылда 820 тонна көкөніс өсіріледі. Жергілікті кәсіпкерлерге қолдау көрсетеміз.

Сарыағаш пен Келес ауданындағы қордаланған мәселелер бойынша арнайы жиналыс өткізіп, шешу жолдарын қарастырамыз.

• 07.10.2022
• 301