Сайрамда игі бастамалар көп

Өңір халқымен кезекті кездесуім Сайрам ауданында өтті. Сайрамдықтармен еркін пікір алмасып, сұрақтарына жауап бердім. Алдыңғы кездесулерде тұрғындар көтерген мәселелер де кезең-кезеңімен шешімін табуда.

Түркістан облысындағы ең ірі аудандардың бірі Сайрамның әлеуметтік - экономикалық дамуына ерекше көңіл бөлінген. Ауылдарды дамытуға басты басымдық беріледі. Жаңа ғана мен ауданда салынған жаңа мектептің ашылуында болдым. Жекеменшік мектеп салудан Сайрам көш бастап тұр. Бұл – үлгілі іс. Мектеп тапшылығын шешу үшін биыл облыста 59 жаңа мектеп салынып жатыр. Мемлекет басшысының арнайы тапсырмасы аясында «Жайлы мектеп» пилоттық ұлттық жобасы аясында жаңа форматтағы 86 мектеп салынады. Онда 60 мың бала білім алатын болады. Бұдан бөлек, Манкент елді мекенінде, Ақсу, Ақбұлақ ауылдарында 600 орындық  3 жаңа мектептің құрылысы жоспарлануда.

Кездесуден кейін тұрғындарды жеке мәселелері бойынша қабылдадым. Кезек күттірмейтін мәселелерді заң аясында шешуге жұмыс істейміз.

Мемлекет басшысы жүктеген жауапкершіліктерді сезініп, барлық бастамаларды лайықты жүзеге асыруға міндеттіміз.

Ауданға жұмыс сапары барысында жеке кәсіпкер салған 1200 орындық мектептің ашылуына қатыстым. Сонымен қатар сүт өнімдерін өндіретін «Aykan» ЖШС-нің жұмысымен таныстым. Кәсіпорында сүт сарысуынан өндірісте қолданатын ұнтақ шығаратын жаңа технология іске қосылды. Бұл – Қазақстанда баламасы жоқ қалдықсыз өндіріс.

Ауыл шаруашылығы өнімдерінің жәрмеңкесіне қатысып, ауданның шаруаларымен жүздестім. Диқандар жылына бірнеше өнім алудың сырымен бөлісіп, мемлекет тарапынан берілетін көмектің артқанына алғыстарын айтты.

• 14.10.2022
• 237