Қазақстанда арнайы құқық субъектілерінің бірінші тізілімі бекітілді

Мемлекет басшысының тапсырмасы аясында Агенттік мемлекеттік және жеке операторлардың қызметін жалғастырудың орынды ма, жоқ па деген талдау жүргізді. Осыған байланысты заңнамалық актілерге тиісті өзгерістер енді. Атап айтсақ, ағымдағы жылдың 3 қаңтарында "Бәсекелестікті дамыту мәселелері бойынша ҚР кейбір заңнамалық актілеріне өзгерістер мен толықтырулар енгізу туралы" Заңға қол қойылды. Оның аясында "арнайы құқық" институтын құру көзделген. 2022 жылғы 1 шілдеде Кәсіпкерлік кодексіне де тиісті өзгерістер енді. Осы шаралардың барлығы мемлекеттік монополия тетіктерін бақылауды жетілдіруге бағытталған. Арнайы құқық Қазақстан нарығында тауарлар мен қызметтерге елеулі әсер ететін монополист-операторларды қатаң реттеуді білдіреді.

11 қазанда 17 оператор алдын ала енгізілген арнайы құқық субъектілерінің тізілімі қалыптастырылып, бекітілді. БҚДА олардың бағаны реттеу қызметі бөлігінде бақылайтын болады, сондай-ақ оларға басқа заңды тұлғаларға қатысып, өзге де қызметпен айналысуға тыйым салынады. Бұл тізім кейіннен жекелеген арнайы құқық субъектілерінің қызметін жыл сайынғы талдауды ескере отырып түзетілетін болады.

• 27.10.2022
• 308