Жинақтау сақтандыру өнімдерін реттеу бойынша

Биыл Агенттік жұмысының ірі блогы сақтандыру өнімдерін жетілдіруге бағытталған. Мәселен, 2022 жылғы 20 қазанда Агенттік «Қазақстан Республикасының кейбір нормативтік құқықтық актілеріне жинақтаушы сақтандыру өнімдерін реттеу бойынша өзгерістер мен толықтырулар енгізу туралы» Агенттік Басқармасының қаулысын қабылдады. Құжат «Қазақстан Республикасының кейбір заңнамалық актілеріне сақтандыру нарығы мен бағалы қағаздар нарығын реттеу және дамыту, банк қызметі мәселелері бойынша өзгерістер мен толықтырулар енгізу туралы» Қазақстан Республикасының Заңын іске асыру шеңберінде әзірленді.

Қаулымен бірлескен зейнетақы аннуитеті шартын жасасу рәсімдері айқындалады. Мұндай аннуитет бір салымшының зейнетақы жинақтары зейнетақы аннуитеті шартын сатып алу үшін жеткіліксіз болған кезде ерлі-зайыптылардың немесе жақын туыстарының (балалары, ата-аналары, әпкелері, бауырлары) зейнетақы жинақтарын біріктіруге мүмкіндік береді.

Бұдан басқа, өмірді жинақтаушы сақтандыру өнімі шеңберінде қарыз алу үшін сақтанушылар ұсынатын құжаттарға қойылатын талаптар жеңілдетіледі, сондай-ақ электрондық нысанда қарыз алу мүмкіндігі беріледі.

Сонымен бірге сақтандыру мен инвестицияларды біріктіретін «Unit-linked» өнімі бойынша сақтандыру ұйымдарын тарату немесе өзге заңды тұлғаға қайта ұйымдастыру кезінде сақтанушылардың активтерін бөлу тәртібі көзделеді, сондай-ақ барлық сақтандырушылар үшін сақтанушылардың активтерін бағалау жөніндегі бірыңғай талаптар айқындалады.

Осы қаулыны қабылдау өмірді жинақтаушы сақтандыру өнімдерінің тартымдылығын арттыруға мүмкіндік береді және сақтандыру қызметтерін тұтынушылар үшін оларға қол жеткізуді жеңілдетеді.

• 31.10.2022
• 242