Жылдың басынан бері Агенттік микроқаржылық қызметті жүзеге асыратын 72 ұйымды лицензиясынан айырды

Қазақстан Республикасының Қаржы нарығын реттеу және дамыту агенттігі тұрақты негізде нарықты қызметі оларға қойылатын талаптарға сәйкес келмейтін және тұтынушылардың  мүдделеріне айтарлықтай қауіп төндіретін жосықсыз орындаушылардан тазарту бойынша жұмыс жүргізуде.

Осыған байланысты, Агенттік 2022 жылдың басынан бастап микроқаржылық қызметті жүзеге асыратын 72 ұйымға, оның ішінде 18 микроқаржы ұйымына, 46 ломбардқа және 8 кредиттік серіктестікке  қатысты  микроқаржылық қызметті жүзеге асыруға лицензиядан айыру түрінде санкциялар қолданды.

Лицензиядан айыру үшін мыналар негіз болды:

• 10 МҚҰ, 7 ломбард және 6 кредиттік серіктестік бойынша: лицензияны алған күннен бастап қатарынан күнтізбелік алты ай ішінде қызметті жүзеге асырмау;
• 1 МҚҰ бойынша: жүйелі түрде (қатарынан күнтізбелік он екі ай ішінде үш және одан көп рет) уәкілетті органның жазбаша ұйғарымын орындамау;
• 1 МҚҰ бойынша: заңдардың, уәкілетті органның, Ұлттық Банктің нормативтік құқықтық актілерінің талаптарын жүйелі түрде (қатарынан күнтізбелік он екі ай ішінде үш және одан да көп рет) бұза отырып, қызметті жүзеге асыру, сондай-ақ заңнамалық тұрғыдан рұқсат етілмеген қызмет түрлерін жүзеге асыру;
• 6 МҚҰ, 39 ломбард және 2 кредиттік серіктестік бойынша: қайта құру немесе таратуға байланысты қызметін ерікті тоқтату.

Осылармен қатар, 2022 жылғы 8 тамыздан «Ломбард Astana Gold» ЖШС-ның лицензиясының қолданысы уәкілетті органның жазбаша ұйғарамын орындамағаны үшін 3 айға тоқтата тұрылған (Заңның
16-бабының 1-тармағының 5) тармақшасына сәйкес).

Агенттік 50 АЕК-ке дейін қысқа мерзімді онлайн микрокредиттер сегментінде өсуді байқады. Осыған байланысты 10 ірі МҚҰ-ны тексеру жоспарланған, олардың үлесіне 50 АЕК-ке дейінгі онлайн микрокредиттер бойынша берешектің шамамен 80%- ы тиесілі. Ағымдағы жылдың соңына дейін 6 МҚҰ-да тексерулер аяқталады.

• 31.10.2022
• 276