Мақта саласындағы өзекті проблемаларға байланысты үкіметке ұсыныстар жолданды

Түркістан облысында туындаған мақта мәселесін шешу мақсатында бірнеше министрліктің жауапты басшылары мен ҚР Парламент мәжілісінің депутаттары Қайнар Абасов пен Сырым Ертаев, мақта зауыттарының басшылары мен диқандардың арнайы қатысуымен алқалы жиын өткіздік. Басқосуда мақта саласындағы өзекті мәселелерді шешудің бірнеше жолын қарастырып, Үкіметке ұсыныстар жолданды. Депутаттар мен кәсіпкерлер мақта мәселесін тек облыс әкімдігі деңгейінде шешу мүмкін емес екенін айтып, нақты ұсыныстарын жеткізді.

Биыл мақта бағасы нақты белгіленбей әрі тұрақсыз болып, салдары осы саладағы агроқұрылымдардың наразылықтарын тудырды. Бұған мақта саласының шикізат күйінде экспортқа бағытталып, өңірде тоқыма тігін кластерін дамыту тиісті деңгейде қолға алынбауы себеп болуда. Аталған мәселе жылда қайталанады. Осыған байланысты агроқұрылымдарды қолдап, мәселені жүйелі шешудің жолын қарастырған жөн. Біздің шаруалар шетелдік трейдерлік компанияларға тәуелді болып отыр. Осыдан арылу мақсатында және шетелдік трейдерлік компаниялардан тәуелсіз жұмыс істеу үшін өңірде мақта кластерін дамытуды қолға алу қажет. Алдағы уақытта ұсыныстарды нақтылап, орталық үкіметтік орган басшыларын өңірге шақырамыз. Шаруалармен, мақта зауыты басшыларымен тағы да кездесеміз. Біз өңір шаруаларының өз жұмысын жүргізіп, отбасыларын асырауларына қолайлы жағдай қалыптастыруға мүдделіміз.

• 01.11.2022
• 250