Төлебиде жаңа кәсіпорын ашылды

Төлеби ауданына тұрғындарымен жүздесіп, маңызды мәселелерді талқылау үшін арнайы бардым. Мемлекет басшысы Қасым-Жомарт Кемелұлы Жолдауында халықтың көкейінде жүрген өзекті мәселелер бойынша тапсырмалар берді. Мемлекет басшысы жүктеген жауапкершілікті сезініп, жұмыс істеуге міндеттіміз. Елімізде «Жайлы мектеп» пилоттық ұлттық жобасы әзірленуде. Салынатын мектептер жана форматта болады. «Жайлы мектеп» жобасы аясында Төлебиде бірнеше мектеп салынады. Ленгірде – 1500 орындық, Бірінші Мамырда – 1500 орындық, Достықта – 900 орындық, Көксәйекте – 600 орындық, сондай-ақ Қосағашта 600 орындық жаңа  мектептердің кұрылысы жоспарланып отыр.

Кездесуде тұрғындар мектеппен, жолмен қамту, жер кезегі, инфрақұрылым, ауыл шаруашылығын, қымыз шаруашылығын субсидиялау және өзге де мәселелерді көтерді. Кездесуден соң тұрғындарды жеке мәселесі бойынша қабылдадым. Әрбір тұрғынның өтініші бойынша тиісті жұмыс жүргіземіз.

Төлеби ауданына жұмыс сапары барысында «КазахБитум» ЖШС-нің мұнай өнімдерін өңдеу зауытындағы үздіксіз полимерді модификациялау цехының ашылуы салтанатына қатыстым. Жол жөндеу жұмыстарына қолданылатын ерекше қоспа өндіретін зауыт жылына 200 мың тоннадан астам өнім өндіруге қауқарлы.

Ел Президенті Қасым-Жомарт Тоқаев биылғы Жолдауында кәсіпкерлік саласын тиісті инфрақұрылыммен қамтамасыз етуді тапсырды. Бүгінде облыста аталған мәселелер бойынша жұмыстар жүргізіліп жатыр. Мемлекет басшысының «10 мың тұрғынға 100 тұрақты жұмыс орындарын ашу» жөніндегі тапсырмасына сәйкес, облысымызда 10 мыңнан астам жаңа жұмыс орындарын ашу жоспарлануда. Сонымен қатар Президент автожол құрылысына, соның ішінде жергілікті жолдардың сапасына баса мән беру керектігін айтқан болатын. 2025 жылға дейін жолдардың кемінде 95 пайызын жақсарту жөнінде тапсырма берді. Бізде әлі күнге дейін битум тапшылығы бар. Аудан аумағында жұмыс істеп тұрған зауыттың жұмысын жандандыру арқылы облысымызда осы мәселені шешеміз. Бүгін іске қосылған полимерді модификациялау цехының маңызы жоғары. Осындай ірі зауыттарымыз көбейе берсін!

Сонымен қатар Бірінші Мамыр ауылдық округінде орналасқан «Балмұздақ» жауапкершілігі шектеулі серіктестігінде болдым. Кәсіпорын жылына 3 мың тоннаға жуық балмұздақ, 15 тонна  тұшпара, жарты миллион тоннадан астам шоколад өнімдерін өндіреді. 200-ге жуық адам тұрақты жұмыспен қамтылған.

• 01.11.2022
• 227