Активтерді қайтару жөніндегі комиссияның отырысы туралы

Бүгін активтерді қайтару жөніндегі ведомствоаралық комиссияның кезекті отырысын өткіздім.

Комиссияның бес ай жұмыс істеген уақытында мемлекетке залал өтелді және жалпы сомасы 630 млрд теңгеден астам активтер қайтарылды. Алыс шет елдерден шамамен 400 млн доллар қайтарылды.

Қадағалау актілері бойынша 5 млрд теңге сомасына 140 мың гектардан астам заңсыз берілген немесе нысаналы мақсаты бойынша пайдаланылмаған жер учаскелері қайтарылды.

Кеден саласында прокурорлық тексеру нәтижелері бойынша бюджетке 57 млрд теңге түсті.

Соттарға құны 13,5 млрд теңге болатын мүлікті мемлекетке қайтару туралы 13 талап қою енгізілді.

Жоғарғы Сотқа олигополиялар пайдасына шығарылған сот актілерін қайта қарау жөнінде 23 наразылық енгізілді. Бүгінде олардың ішінде 16 наразылық қанағаттандырылды, нәтижелері бойынша бюджетке 23 млрд теңге түсуі күтілуде. Тағы 7 наразылық қаралып жатыр.

Отырыс қорытындысы бойынша комиссия жұмысының тиімділігін одан әрі арттыру жөнінде шешімдер қабылданды.

• 02.11.2022
• 280