«Sembol Construction» компаниясының өкілімен кездестім

Түркістанға кезекті инвестициясын салып, ауқымды жобаларды жүзеге асыруға ниетті «Sembol Construction» компаниясының өкілімен кездестім. Компания өңірде кабель және керамикалық өнімдер мен сантехника шығаратын зауыт ашуға ұсыныс білдірді.

Ұсынып отырған жобалар өңіріміз үшін өте маңызды. Инвестиция құямын дейтін компанияларға, азаматтарға қолдау көрсетуге әрқашан дайынбыз. Жобаларды іске асыруға арналған инфрақұрылым бойынша сұраныстарыңызды толық орындаймыз. Арнайы экономикалық аймақтан жер, инфрақұрылым ұсынамыз. Қазақстан-Түркия ынтымақтастығының Түркістан облысының дамуында ерекше маңызы бар екенін атап өткім келеді. Түркістан – қасиетті шаһар. Қасиетті қалада айтылған уәделер, сөздер орындалуы керек. Әріптестігіміз нығайып, жобалар жүзеге асады деп сенемін.

«Sembol Construction» компаниясының қаржы жөніндегі Атқарушы Кеңесінің мүшесі Октай Горгул зауыт салу жұмыстарымен осы салада тәжірибесі бар түркиялық компаниялар айналысатынын жеткізді.

Керамикалық өнімдер шығаратын зауытта Италияның құрылғылары орнатылып, соңғы шыққан технологиялар қолданылады. Аталған зауыттарда 1000-ға жуық жұмыс орны ашылмақ. Бүгінде Қазақстан кабель мен керамикалық өнімдердің басым бөлігін шетелден импорттайды. Бұл зауыттар арқылы отандық өнімнің үлесін арттырамыз.

• 08.11.2022
• 206