Ағымдағы жылдың 21-25 қарашасында Душанбе қаласында (Тәжікстан) Қылмыстық кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық Топтың (ЕАТ) 37-ші пленарлық апталығы өтуде

Аталған іс-шара аясында ашық дауыс беру қорытындысы бойынша Агенттіктің екі өкілі типология, терроризм мен қылмысты қаржыландыруға қарсы іс-қимыл, техникалық жәрдемдесу жөніндегі екі жұмыс тобының тең төрағасы лауазымына сайланды.

Бұған дейін Қазақстан бір ғана жұмыс тобына тең төрағалық еткен.

Сонымен қатар, ҚМА төрағасы Жанат Элиманов Тәуелсіз Мемлекеттер Достастығына қатысушы мемлекеттердің Қаржылық барлау бөлімшелері басшылары кеңесінің (ҚБББК) 10 жылдығына арналған 21-ші отырысына қатысты.

Отырыс шеңберінде кеңестің 10 жыл ішіндегі қызметінің қорытындысы шығарылды. Сондай-ақ алдағы жылға арналған жұмыс жоспары қаралды.

ҚБББК-ға мүше мемлекеттер осы халықаралық ұйым шеңберіндегі өзара іс-қимылды және одан әрі ынтымақтастықты кеңейту ниеттерін растады.

Сонымен қатар, пленарлық апта аясында ЕАТ-ға мүше мемлекеттердің парламентарийлерінің форумы өтті, ол ЕАТ-ға мүше мемлекеттердің заң шығарушы билігі мен қаржылық барлау бөлімшелерінің өкілдерін жинады.

Қазақстан тарапынан форумға ҚР Парламенті Сенатының Қаржы және бюджет комитетінің депутаттары Сұлтанбек Макежанов пен Бақтыбай Шелпеков және ҚМА төрағасы Жанат Элиманов қатысты.

Қазақстан Парламентінің Сенаторлары соңғы жылдары ұлттық заңнамаға FATF стандарттарын енгізу мақсатында ел заңнамасын жетілдіру практикасын таныстырды. Форум соңында осы бағытта жүргізілген жүйелі бірлескен жұмысты жалғастыруға арналған қорытынды декларация қабылданды.

• 24.11.2022
• 263