Түркістан қаласында Ахмет Байтұрсынұлының 150 жылдық мерейтойына арналған Халықаралық түркітанушылар конгресі өтті

Конгреске қатысушыларға  Қазақстан Республикасының Президенті Қасым-Жомарт Тоқаевтың құттықтау хатын оқып бердім. Мемлекет Басшысының құттықтауында «Ұлт ұстазы  атанған Ахаң түбі бір, тарихы тамырлас елдер үшін аса құнды ғылыми-танымдық мұра қалдырды. Сол себепті оны барша түркі жұрты құрмет тұтады»  делінген. 

Конгрессте ЮНЕСКО Бас директорының орынбасары Рамос Габриела, ТҮРКСОЙ Бас хатшысының орынбасары Билял Чакыджы Ахмет Байтұрсынұлының 150 жылдық мерейтойымен құттықтады. ҚР Ғылым және жоғары білім вице-министрі Талғат Ешенқұлов мерейтой аясында атқарылған маңызды іс-шаралар жөнінде, еліміздің және Түркия, Әзірбайжан, Өзбекстан, Ресей ғалымдары тұлғаның болмысын ашатын мазмұнды баяндамалар жасады. 

Конгресс аясында Ахмет Байтұрсынұлының 12 томдық жинағының, Ахмет Байтұрсынұлының таңдамалы шығармаларының 4 тілде  (қазақ, орыс, ағылшын, түрік) әзірленген кітабының, профессор Қаржаубай Сартқожаұлының «Орхон ескерткіштерінің толық атласы» 3 томдығының, филология ғылымдарының докторы Алмасбек Әбсадықовтың «Серт», «Ұстаз жолы» кітаптарының тұсаукесері өтті.

Әлемнің бірнеше елінен келген ғалымдар мен зерттеушілердің Түркістанда бас қосуы – біз үшін үлкен мәртебе!
Алаштың ардақты азаматы, тіл реформаторы Ахмет Байтұрсынұлы атындағы конгрестің Түркістанда өтуінде үлкен мән бар. 

Алдағы уақытта Түркістан түркі елдеріне ортақ рухани астана ретінде дамиды.  Осы бағытта жұмыс жүргіземіз.

• 24.11.2022
• 261