ЯФИ-да журналист-блогерлердың пресс-туры өтті

2022 жылдың 28 қарашасында ҚР ЭМ «Ядролық физика институты»  РМК-да республикалық журналист-блогерлерге арналған пресс-тур өтті. Пресс-тур "Қазақстандық атом электр станциялары" ЖШС бірлесіп ұйымдастырылды.  

Баспасөз-тур барысында  14 журналист-блогерге институттың қызмет бағытынан бастап ғылыми, өндіріс жетістіктері таныстырылды.

Баспасөз тур алдымен ССР-Қ зерттеу реакторынан басталды. ССР-Қ  бас инжерінің орынбасары Дәурен Нұғманов журналистерге  реактордың құрылымы жайында түсінік берді. Реакторда жүргізіліп жатқан жұмыстар және төмен байытылған уран изотоптарын қолдану арқылы қажетті материалдың қаншалықты өндірілетінін бас инженердің орынбасары Мұхаметұлы Бақдәулет атап өтті.

«Ядролық реакция жүрі барысында реактор нейтрон шоғырын береді. Ғылыми зерттеу реакторы кремнийді зерттеп, залалсыздандырып, сәулелендіреді. Археологиялық-геологиялық-инженерлік нысандардың ішкі құрылымын зерттейді. Мұнымен қоса, нейтронды шоғырдың көп болуы нәтижесінде заттарды радиациялық тұрғыдан байыта аламыз. Яғни, табиғи тастарды әртүрлі түске бояу, одан соң медицина үшін фармацевтикалық дәрі-дәрмектер, атап айтқанда онкологиялық ауруларды емдеуге арналған радиоактивті йод шығарамыз», – деді. Сондай-ақ Мұхаметұлы Бақдәулет еліміздегі атом электр станциясының құрылысы мен сала мамандарының жеткіліктілігіне қатысты блогерлердің бірқатар сауалдарына жауап берді.

Баспасөз-тур аясында блогер, журналистер кешенді экологиялық зерттеулер орталығына барды. Орталық басшысы Виктор Глущенко аналитикалық зертханаларға экскурсия жасап, зертхананың жұмыстарымен және құрылғылармен таныстырды.

Сондай-ақ пресс-тур барысында журналистер институттың бас директоры Саябек Сахиевпен кездесіп, институтқа қатысты сауалдарын қойды. Саябек Қуанышбекұлы базалық қондырғылар мен өндірістік жұмыстарға тоқталды. Ол шетелдік мамандар институтта шығарылатын радиофармацевтикалық препараттарды шығару орталығының жұмысына қызығушылық танытқанын атап өтті.

 «Бізде радиоизотопты дәрілер тасуға әуе компаниялардың лицензиясы жоқ. Егер таситын болса, Қазақстанның кез келген қаласына, тіпті шетелге де жеткізе аламыз. Біз өзіміз үшін бағаны төмен қоямыз. Бірінші мақсат – халықтың денсаулығы, екінші – болашақта медициналық туризмді дамыту. Кеше ғана Түркияға іссапармен барып келдім. Олар да қызығып отыр. Себебі, қазір оларда жұмыс істеп тұрған реактор жоқ. Қазір медицинаға аса қажет йод, молибден, фтор да реактор арқылы өндіріледі. Алдағы уақытта түрік делегациясы бізге ұсыныспен шықса, көмектесуге дайынбыз», – деді бас директор.

Пресс-тур соңына дейін журналистер мен блогерлер барлық көкейтесті сұрақтарына жауап алды.

• 30.11.2022
• 277