Жеке сот орындаушыларының қызметін тексеру туралы

Прокурорлар жеке сот орындаушыларының өндіріп алынған ақшалай қаражаттарды уақтылы және толық аударуына тексеру жүргізді.

Тексерулер ЖСО өндіріп алушылардың шоттарына аударуға жататын 1,1 млрд теңге мөлшерінде ақша жымқырудың 660 фактісін анықтады.

Мәселен, елордалық ЖСО алимент бойынша жоқ қарызды әдейі анықтап, сот үкімімен мемлекеттің пайдасына тәркіленуге жататын 289 млн теңгені жеке тұлғаның банктік шотынан шешіп алған.
Ол бұл қаражатты Астана қаласы Сот актілерін орындау департаментінің бұрынғы бастығына аударған. Осы қызметі үшін ЖСО 10 млн теңге ұстап қалған.

Қарағандылық 7 ЖСО борышкерлердің 110 млн теңге көлеміндегі қаражатты жеке қажеттіліктеріне жұмсаған.

Павлодарда ЖСО 3 жыл бойы 520 мың теңгеге екі баланың алимент қаражатын жымқырып отырған.

Осыған ұқсас мысалдар жетерлік.

Ақша қаражатын ұрлау мен ысырап етудің анықталған фактілері бойынша сотқа дейінгі 16 тергеп-тексеру басталды.
Сондай-ақ, қадағалау актісі бойынша 7 ЖСО лицензиясы алып қойылды, 2 лицензия тоқтатылды, 55 адам тәртіптік жауапкершілікке тартылды.

• 02.12.2022
• 347