Құрметті достар,

Менің блогыма кіргендеріңізге алғыс білдіремін. Бұл блог барлық өзекті мәселелерді талқылау үшін тиімді алаңша болып қызмет етеді деп үміттенемін.

2017 жылдың желтоқсан айында «Цифрлық Қазақстан» мемлекеттік бағдарламасы қабылданды, бұл бағдарлама 2018 ж. бастап 2022 жылдары аралығында жүзеге асырылатын болады. Елбасымыз бастамалаған бағдарлама халық үшін озық технологиялардың қолжетімділігін қамтамасыз ете отырып, елімізді дамудың сапалы жаңа деңгейіне шығаруға арналған.

Өнеркәсіпті, көлік пен логистиканы цифрландыру, «Ақылды» қала, денсаулық сақтау, білім беру және басқа салалардағы жобалар еңбек өнімділігін арттыруға, сервистік қызметтердің сапасын қамтамасыз етуге, қауіпсіздікті жоғарылатуға бағытталған. Бағдарламада, мысалы, кәсіпкерлікті және бизнесті дамытуды ынталандыратын электрондық коммерция нысандары үшін салықтық жеңілдіктер сияқты қолдау шаралары қарастырылған. Одан басқа, цифрландыру біздің отандық әзірлемелерді ендіруге және Цифрлық Қазақстанның жобаларына дарынды мамандарды тартуға мүмкіндік береді.

Қазақстанда құрылатын инновациялық экожүйе бизнес-инкубациялау мен стартаптарды дамыту үшін жағдайларды қамтамасыз етеді.

Осы жылы денсаулық сақтау, білім беру, көліктік-логистикалық салаларында, қауіпсіздік, ауыл шаруашылығында, құрылыста, ТКШ-да және басқа да салаларда пилоттық жобалар жүзеге асырылып жатыр. Бұл, жобаларды толық пайдалануға қосар алдында, қателерді айқындап, оларды жоя алатын апробацияның өте маңызды кезеңі.

«Цифрлық Қазақстан» жобаларының бір қатарын жүзеге асыру мемлекеттік-жекешелік әріптестікті қоса алғанда, бизнестің де қатысуын болжайды, сондықтан біз AstanaHub халықаралық  ІТ-стартап технопаркінің алаңшасында барлық ұсыныстарды ашық талқылауға дайынбыз. Талқылау кестесі осында, менің блогымда, электрондық үкімет порталында жарияланатын болады.

Осыған байланысты, мен Сіздерді «Цифрлық Қазақстан» мемлекеттік бағдарламаның жобаларына қатысты пікірлеріңізбен белсенді бөлісуге шақырғым келеді, Сіздердің комментарийлеріңіз, ұсыныстарыңыз бізге кемшіліктерді жедел дұрыстауға мүмкіндік береді және қазақстандықтардың игілігі үшін өте маңызды бастамаларды жүзеге асыруға көмектеседі.

 

Изгі тілекпен,

Асқар Жұмағалиев

Қазақстан Республикасы Цифрлық даму, қорғаныс және аэроғарыш өнеркәсібі министрі​