Біз Digital Nomads өкілдерімен бірге Қазақстандық оқушылар мен студенттерге арнап, тұрақты дәрістерді ұйымдастырдық

Достар, өткен жылы біз Digital Nomads қауымдастығын жинағанымыз естеріңізде болар. Бұл Нью-Йоркте Президентпен кездесуге қатысқан жастардың қауымдастығы.

Осы уақыт ішінде біз Digital Nomads өкілдерімен бірге Қазақстандық оқушылар мен студенттерге арнап, тұрақты дәрістерді ұйымдастырдық, сондай-ақ спорттық бағдарламалауды қолдау бойынша жұмыстар жүргіздік.

Мен елімізде өзіміздің спорттық бағдарламалау Федерациясының құрылғанын қуана хабарлағым келіп отыр, ал маған оған жетекшілік ету мәртебесі бұйырды.

Бүгінгі таңда Спорттық бағдарламалау – бұл болашағынан үміт күттірер интеллектуалды спорт түрі, мұнда жасөспірімдер математикалық алгоритмдік есептерді бағдарламалау тілдерін қолдана отырып шешеді.
Қазақстандық оқушылар мен студенттер IOI және ICPC сияқты халықаралық жарыстарға тұрақты түрде қатысып, жоғары нәтижелерге қол жеткізуде.

Федерацияны құра отырып, біз халық арасында спорттық бағдарламалауды дамыту мен насихаттау жұмыстарын жүргізуді, сондай-ақ осы бағытта түрлі жарыстарға қатысатын жастарымыздың нәтижелерін одан әрі жақсартуды жоспарлап отырмыз.
Атап айтқанда, Федерация ұлттық және халықаралық деңгейде іс-шаралар өткізуді ұйымдастырады, білім беру мекемелерінде экожүйені дамытады және спорттық бағдарламашыларды даярлау әдістемесін әзірлейді.

Федерация Президиумының алғашқы кездесуін өткіздік, онда біз 2023 жылға арналған спорттық бағдарламалауды дамытудың алдағы мақсаттары мен міндеттерін талқыладық. Айта кетейік, жиынға ZOOM форматында, түн уақытына қарай, бейресми жағдайда нағыз IT мамандар сияқты жиналдық, ал кездесуге қатысушылар әлемнің түкпір-түкпірінен қосылды!

Біз спорттық бағдарламалауды жаңа деңгейге көтеріп, мықты IT-мамандардың жаңа буынын қалыптастыра аламыз деп сенемін!

• 18.01.2023
• 280