ҚР Премьер-Министрі Әлихан Смайыловтың қатысуымен министрліктің алқа отырысы өтті. Өткен жылдағы атқарылған жұмыстарды қорытындылап, 2023 жылғы жоспарларымызбен бөлістік.

Қол жеткізілген нәтижелер мен жаңа міндеттер туралы айта отырып, олардың маңыздыларына тоқтала кетейін.

Бірінші. Халық пен бизнестің мемлекеттік қызметтерге қол жетімділігі және олардың сапасын арттыру маңызды. Біз үшін ең бастысы – барынша адамдарға бағдарлану. Яғни азаматтардың талап тілегін ескеру. Осыған сүйене отырып, біз 40 қызмет түрін проактивті форматқа ауыстырдық. Бұдан басқа, сыртқы платформаларға (екінші деңгейлі банк қосымшалары) 15 мемлекеттік қызметті шығардық, сондай-ақ қазіргі уақытта қосымшаларда 20 цифрлық құжат қолжетімді.

Мемлекеттік қызметтердің 80%-ы және барлық цифрлық құжаттар смартфондар арқылы қол жетімді. Бүгінгі таңда электрондық қызметтердің жалпы үлесі 92% құрайды. Осылайша «көрінбейтін мемлекет» тұжырымдамасын жүзеге асыру бағытында тиісті жұмыстарды атқарудамыз.

Екінші. электронды денсаулық сақтау – eDensaulyq қызметі туралы айтсам. Аталған жүйе дәрігерлерді мыңдаған анықтамалардан босатып, бюрократияға жол бермей, пациентке нақты қамқорлық жасауға көмек көрсетеді. Ондаған базалар мен ақпараттық жүйелерді бір терезеге көшіру арқылы пациент бойынша барлық қажетті ақпаратты бір жерден алуға болады. Өз кезегінде қазақстандықтар өздерінің медициналық деректеріне толық қол жеткізеді және ЭЦҚ арқылы келісімге қол қойып, кейбір медициналық мәселелерді онлайн шеше алады.

Үшінші. Халыққа қызмет көрсету орталықтарын жаңғырту. Өткен жылы біз 12 өңірдегі 14 орталықты жаңарттық, биыл тағы 50 орталық жоспарда тұр. Келешекте елімізде барлық қажетті ұйымдар бір жерде орналасқан азаматтарға жайлы және сапалы қызмет алуға арналған, халыққа қызмет көрсету орталықтарының супермаркетіне негізделген Суперцондар пайда болады.

Төртінші. GovTech платформалық моделін енгізу. Барлық ақпараттық жүйелерді бір жерге шоғырландырып, оларды біріктіру және бірыңғай жоба шеңберінде дамыту жоспарлануда. Платформа мемлекеттік органдарға сервистер құруға мүмкіндік беретін бұлтты ресурстар мен құралдарды ұсынады.

Бесінші. Халықты жоғары жылдамдықтағы сапалы интернетпен қамтамасыз ету мақсатында байланыс саласын және «Қолжетімді интернет» ұлттық жобасын дамыту. Осы жоба аясында 3 мыңға жуық елді мекенге оптикалық интернет жеткізіледі. 5-ші буынның ұялы байланыс желілерін 20 қалаға орнату басталады.

Алтыншы. Ақпараттық қауіпсіздік. «Электронды үкімет» объектілері мен аса маңызды нысандарды қорғау талаптары белгіленді, сапалы кәсіби қызметтер нарығы құрылды, білім беруге бағытталған гранттар саны ұлғайып, киберқауіпсіздік мәдениеті артты. 2022 жылы операторлар 734 000 алаяқтық бағыттағы қоңырауларға тосқауыл қойды. Қазақстан БҰҰ-ның киберқауіпсіздік бойынша рейтингінде 31-ші орынға көтерілді.

Жетінші. Бүгінде Smart City жүйесін іске асыру бойынша өңірлермен белсенді жұмыс жүргізілуде. Рейтинг көшбасшылары -Астана және Алматы, аутсайдерлер - Қостанай және Атырау. Осы ретте, өткен жылы 10 моноқалада және 58 ауданда бейнебақылау жүйесі енгізілді, барлық облыс орталықтарында «электронды билеттеу» жүйесі енгізілді. Астана қаласының «iQala» қызмет көрсету орталығының оң тәжірибесі басқа да өңірлерге таратылды.

Мақсат-міндеттеріміз айқын. Алдағы уақытта халық игілігі жолындағы жобаларды жүзеге асыруды жалғастыратын боламыз.

• 27.01.2023
• 282