Енді қазақстандықтар көлік құралдары иелерінің азаматтық-құқықтық жауапкершілігін міндетті сақтандыру полисінің электрондық нұсқасын пайдалана алады

2020 жылы Мемлекет басшысы Қазақстан Халқына Жолдауында, ақпараттың цифрлық расталуын қамтамасыз ете отырып, неғұрлым талап етілетін анықтамалар мен қағаз құжаттарды цифрлық нұсқасымен алмастыруды тапсырды.

Жеке куәлік, баланың туу туралы куәлігі, некені қию және бұзу, атын, тегін, әкесінің атын өзгерту сияқты алғашқы цифрлық құжаттар мен анықтамалар дәл сол кезде пайда болды.

Қасым-Жомарт Кемелұлының тапсырмасы бойынша осы бағыттағы жұмыстар күшейтіліп, электрондық құжаттардың тізімі өсті. Ал, 2022 жылдың жазында цифрлық құжаттарды қолдануға заңды рұқсат беретін беретін цифрландыруды дамыту туралы заң қабылданды.

Бүгінгі таңда цифрлық құжаттар тізімінде жүргізуші куәлігі, вакцинация паспорты, туу туралы куәлік бар. Жақында осы тізімге біз ҚР азаматының паспортын, сондай-ақ елімізде тұруға рұқсат беретін ықтиярхатты, азаматтығы жоқ адамдарға берілетін куәлікті қостық. Осылайша жүйеде барлығы 20-дан астам цифрлық құжат бар.

Бұл жолы eGovMobile қосымшасындағы цифрлық құжаттар сервисі тағы бір қызметпен толықтырылды. Енді қазақстандықтар көлік құралдары иелерінің азаматтық-құқықтық жауапкершілігін міндетті сақтандыру полисінің электрондық нұсқасын пайдалана алады.

Сақтандыру полисі ресми түрде қағаз құжатпен қатар заңды күшіне ие және сақтандыру компаниясы, сақтандыру полисінің мерзімі және тағы басқа ақпаратты қамтиды.

Сандық сақтандыру ыңғайлы, өйткені кез-келген уақытта, мысалы, оның жарамдылық мерзімін, сенімділігін және басқа деректерді тексеруге болады.

Барлық мәліметтер Цифрлық даму министрлігі, ҚР Ұлттық Банкі және «Ұлттық ақпараттық технологиялар» АҚ-ның үйлестірілген жұмысының негізінде «Мемлекеттік кредиттік бюро» АҚ-ның ақпараттық жүйесімен интеграциялау арқасында қолжетімді болды.

Құжаттарды цифрландыру бойынша жұмыс жалғасады, болашақта біз біртіндеп жаңа өнімдерді ұсынатын боламыз.

• 16.03.2023
• 257