«ЖЕРІ КҮРІШТІ, ЕЛІ ЫРЫСТЫ ҚЫЗЫЛОРДА» КҮРІШ КӨРМЕ-ЖӘРМЕҢКЕСІ ӨТТІ

Қызылордаға ҚР Премьер-Министрінің орынбасары-Сауда және интеграция министрі Серік Жұманғарин бастаған Үкімет делегациясы жұмыс сапарымен келді. Делегация мүшелері облыс әкімі Нұрлыбек Нәлібаевпен бірге ауыл шаруашылығы  нысандарының жұмысымен танысып, «Жері күрішті, елі ырысты Қызылорда» атты 2 күндік күріш көрме-жәрмеңкесіне қатысты.

Алдымен Үкімет басшысының орынбасары Сырдария ауданындағы «Мағжан и К» ЖШС күріш ақтау және тұз өндіру зауыттарының жұмысымен танысты. Заманауи жоғары технологиялық құрал-жабдықтармен жабдықталған және бірыңғай автоматтандырылған жүйе арқылы басқарылатын кәсіпорын азық-түлік тауарларының бірқатар түрін шығаруда.

Әрі қарай Серік Жұманғарин «Абай-Даулет» ЖШС  күріш зауытын және күріш сататын арнайы дүкенін аралады. «Жан Арай» ЖШС агроөнеркәсіп кешенінің қуаттылығы 4000 тонна қойма құрылысымен танысты.

Сонымен қатар ҚР Премьер-Министрінің орынбасары күріш көрме-жәрмеңкесінің салтанатты ашылу рәсіміне қатысты. Көрме-жәрмеңкені республика көлемінде күріш бағасын тұрақтандыру мақсатында Қызылорда облысының әкімдігі, ҚР Ауыл шаруашылығы министрлігі мен ҚР Сауда және интеграция министрлігі бірлесіп ұйымдастырған. Оған барлық облыс әкімдерінің салалық орынбасарлары, әлеуметтік-кәсіпкерлік корпорация төрағалары және  ел өңірлерінен 100-ден астам кәсіпкер қатысуда.

Көрмеден кейін Серік Жұманғарин  мәжіліске қатысып, Қызылорда облысының бизнес-қауымдастығы өкілдерімен кездесті.

Сенбі күні Үкімет делегациясы Сыр өңірінің су шаруашылығы нысандарына барып, «Абзал және К» ТС күріш алқабын аралады. Сондай-ақ Н.Ілиясов ауылының абаттандыру жұмыстарымен,  әлеуметтік нысандарымен танысты.

©Қызылорда облысы әкімінің баспасөз қызметі

• 26.06.2023
• 185