Астанада «Заң шығару және құқықтық ақпарат: жетістіктер мен перспективалар» атты халықаралық ғылыми-тәжірибелік конференция өтті

Конференция ашылуында сөз сөйлеген Әділет министрі Азамат Есқарев конференцияның еліміздің норма жасау саласындағы бірегей ғылыми ұйым – ҚР Заңнама және құқықтық ақпарат институтының 30 жылдығына орай орайластырылғанын атап өтті.

Сондай ақ :«Институт Қазақстанның құқықтық жүйесінің ажырамас бөлігі бола отырып, заңнамалық актілерді әзірлеу, заңнаманың тиімділігін талдау, құқықтық ақпаратты жүйелеу кезінде ғылыми көмек көрсететін сараптамалық ұйым ретіндегі өз ұстанымын берік нығайтып келеді. Институт өзінің бүкіл қызмет атқару кезеңінде құқықтың ең өзекті мәселелері бойынша жыл сайынғы іргелі және қолданбалы ғылыми зерттеулер жүргізу арқылы Қазақстандық заң ғылымының дамуына белсенді ықпал етті», - деді Әділет министрі.

Шара барысында конференцияға қатысушылар баяндамалар мен келіп түскен ұсыныстарды тыңдап, қоғамдағы түрлі салаларға тиімді ықпал ете алатын сапалы заңнамалық актілерді әзірлеу заң шығару қызметінің қажетті кезеңі болып табылатыны туралы ортақ пікірге келді. Конференцияға қатысушылар заң жобаларын әзірлеу кезінде ғылымның мәртебесін нығайту арқылы Институттың ғылыми және заң жобалау қызметіндегі рөлін күшейту мәселесіне ерекше назар аударды.

Аталған шараға: ҚР Парламентінің депутаттары, ҚР Президенті Әкімшілігі, ҚР Конституциялық Сотының, ҚР Жоғарғы Сотының, ҚР Бас прокуратурасы, мемлекеттік органдар, халықаралық және үкіметтік емес ұйымдар, жоғары оқу орындары, Қазақстанның және шет мемлекеттердің ғылыми қауымдастығы өкілдер қатысты.

Конференция қорытындысы бойынша барлық қатысушылар ортақ шешімге келіп, заң шығару қызметінің сапасын жақсарту үшін ұсынымдар әзірленді. Қатысушылардың барлық баяндамалары материалдар жинағында жарияланады және «Zan» деректер базасында орналастырылатын болады.

• 29.09.2023
• 195