Сауран көшесіндегi алғашқы ХҚКО-ларымыздың біріне соқтым. Қазір онда тек автомобильдер бойынша рәсімделген мәмілелердің дайын құжаттары және онлайн тапсырыс берілген дайын жүргізуші куәліктері беріледі

Яғни, белгiлi бiр азамат Kaspi, Halyk bank немесе eGov арқылы автокөлікті сатып алу-сату немесе сол бойынша мәміле жасаған кезде, оған дайын құжаттарды алу үшін қаланың шетіне барудың қажеті жоқ. Олар Сауран көшесіндегi ХҚКО-на барып қажетті құжаттарын өзiне ыңғайлы түрде қосымша кезексіз ала алады.

Саурандағы ХҚКО-ның қызметi бір жыл бұрын дәл осындай клиентке бағытталған жұмыс стиліне ауыстырылды. Қазір бұл орталық тәулігіне 300-400 адамға қызмет көрсете алатындай қарқынға ие. Осылайша, біз халыққа қолайлы жағдай жасадық.

Клиенттерге қызмет көрсететін оператор мені танымады, дегенмен сауалдарға жауап берді. Бірақ содан кейін менің қандай қызметке келгенімді сұрағанда, өзімді таныстырып, “қызметтің қалай көрсетіліп жатқанын көру үшін келдім” деп айтуға тура келді. Оператор қызмет көрсету туралы ақпаратпен бөлісті. Сонымен қатар, біз жақсартуды қажет ететін процестерді талдадық. Бұл - нөмірлерді сақтау процессі, олардың барлығы әлі де қағаз тізімде сақтаулы екенін оператордан естіп, бірден жауапты қызметкерге қоңырау шалып, шешілуі керек мәселелер туралы айттым.

Қызмет көрсету орталығында азаматтарымыздан автокөлікті қайта рәсімдеу бойынша онлайн қызметтер туралы жақсы пікірлер естіп, қуанып қалдым. Мен олармен жақын арада автомобиль сатып алғанда, көліктің бұрынғы нөмірлерін қалдыруға болатыны туралы жаңалықпен бөлістім. Бұл азаматтарымызға ХҚКО-ға мүлдем бармауға болатындай мүмкіндік туғызады.

Бұл шешім Ішкі істер министрлігімен бірлесіп қабылданды және іске асырылуда. Менің ойымша, бұл қызметті келесі жылдан бастап пайдалана алатын боламыз.

ХҚКО-ны аралау кезінде онда сақталатын нөмірлерге де назар аудардым.

Олар қазір қораптарда сақталады, бұл нөмірлерді іздейтін қызметкерлер үшін де, күткен клиент үшін де қолайсыздық туғызады. Сондықтан мен SMART сөрелерді, сондай-ақ қажетті нөмірлерді іздеуге арналған қосымшаны ойластыруды ұсындым. Ол үшін жүйеде қандай нөмір қай сөреде сақталатынын есепке алып, сәйкес штрих-кодтауды енгізу қажет.

Бұл не береді? Мұндай жаңалық кішкентай болып көрінгенімен, мультипликативті әсер береді: бір жағынан қызметкердің жұмысын жеңілдетеді және қызмет алушының уақытын үнемдейді. Жұмысты бір жүйеге түсіру әрқашан корпорацияның қызметі үшін үлкен жетістік болып саналады.

Мені таныған клиенттер келіп, фидбэкпен бөлісті және ХҚКО-лардың жұмысы үшін алғыстарын білдірді. Ал мен атқарылған жұмыстар үшін Халыққа қызмет көрсету орталықтарының ұжымына алғыс айтамын.

• 11.10.2023
• 159