NVIDIA Inception бағдарламасы бойынша Astana Hub стартаптарына арналған онлайн вебинар іске қосылады

Кеше NVIDIA корпорациясының аймақтық менеджері Антон Юраевпен кездесіп, әріптестігіміздің болашағы мен әлеуетін талқыладық. Қазақстанда friendly-жасанды интеллект экожүйесін құру үшін NVIDIA AI Enterprise өнімін енгізу мүмкіндіктерін қарастырдық. Ұлттық LLM құруға жеткілікті NVIDIA есептеу ресурстарын сатып алу мүмкіндігі туралы айттық.

Кездесу барысында мен кәсіпкерлерге есептеу қуаты мен бейінді оқыту бағдарламаларын пайдаланудың артықшылықтарын игеруге мүмкіндіктер ұсынудың маңызын атап өттім. Цифрландыру министрлігі әрдайым IT саласының жаңа тенденцияларын ұстануға және елдің әртүрлі салаларын тұрақты дамыту үшін жасанды интеллект әлеуетін пайдалануға тырысады.

Жетекші графикалық процессорлары мен интегралды схемалары бар NVIDIA электроникадан жасанды интеллектке дейін әртүрлі салалардағы инновацияларды дамытудың бірегей мүмкіндіктерін ұсынады.

Осы орайда, мен NVIDIA Inception бағдарламасы бойынша Astana Hub стартаптарына арналған онлайн вебинардың – жасанды интеллект және деректер туралы ғылым саласындағы стартаптарды қолдайтын виртуалды акселератордың дайындалғанын қуана хабарлағым келеді. Бұл жоба стартаптарға NVIDIA экожүйесі аясында табысты даму үшін қажетті ресурстар, тәжірибе және мүмкіндіктер береді.

2024 жылдың басында біз Қазақстанның университеттерінде deep learning және жасанды интеллект бойынша практикалық курстар мен сертификаттар ұсына отырып, DLI бағдарламасы бойынша онлайн вебинар өткізуді жоспарлап отырмыз. Бұл жеке тұлғалар мен ұйымдардың озық технологиялар саласындағы мүмкіндіктерін кеңейтуге көмектесері анық.

Бұдан бөлек, біз қазіргі таңда Astana Hub базасында AI Академиясын құру мәселесін қарастырып жатырмыз, оның аясында Орталық Азия елдеріне бейімделген жасанды интеллект саласындағы базалық курс оқытылатын болады.

• 06.12.2023
• 163