IT-стартап алғаш рет «Алтын сапа» президенттік сыйлығын алды

Бұл – Қазақстанның IT-қауымдастығы үшін тарихи оқиға. IT-өнімдерінің таныла бастауы индустрияның қарқынды дамығанын көрсетеді, ол саланы ел экономикасының маңызды және негізгі буынына айналдыруға ықпал ететіні анық.

«Алтын сапа» президенттік сыйлығы MED365 компаниясына «Өндірістік мақсаттағы үздік кәсіпорын» номинациясы бойынша табысталды, сондай-ақ ол 221 өтінімнің арасынан бас жүлдеге ие болды. Бұл стартап – Қазақстан тарихындағы «Алтын сапа» жоғары сыйлығын алған алғашқы IT-компания. Мұндай марапаттар жекелеген компанияларға айрықша мәртебе беріп қана қоймай, тұрақты және заманауи ұлттық экономиканы құруда IT саласының мойындалуына айтарлықтай ықпал етеді.

Байқаудың басты критерийі – ұйымның өнім немесе қызмет сапасы саласында елеулі нәтижелерге қол жеткізуі, олардың қауіпсіздігін қамтамасыз ету, сондай-ақ ұйымның сапаны басқарудың жоғары тиімді әдістерін енгізуі. MED365 компаниясының өнімі дәл осындай артықшылықтарымен ерекшеленеді. Бұл – медициналық тексерулерді жүргізуге көмектесетін медициналық тексерулердің автоматтандырылған жүйесі (МТАЖ). Ол әртүрлі кәсіпорындардың жұмысшыларына ауысым алдындағы және ауысымнан кейінгі медициналық куәландыруды жүргізуге көмектеседі.

МТАЖ тонометрмен, термометрмен, алкотестермен және пупиллометрмен жабдықталған. Автомат бір минуттың ішінде адам денсаулығына қатысты деректерді жинайды және талдайды, ақпаратты дәрігердің компьютеріне жібереді, бұдан кейін дәрігер қызметкерді жұмысқа жіберуге немесе жібермеуге ұсыныстар береді. Бағдарлама күнделікті мәліметтер негізінде адамдардың жай-күйіне талдау жүргізеді және денсаулығы бойынша теріс өзгерістер болған жағдайда, алдын алу шараларын қабылдау үшін дәрігерге белгі жібереді.

МТАЖ бірнеше маңызды мәселені шешеді: медициналық тексеруге кететін уақытты қысқартады, адам факторының рөлін төмендетеді, кәсіпорындарда жарақат алу мен өлім қаупін азайтады.

Бұл стартап өз өнімдерін халықаралық нарықтарда, атап айтқанда MENA (Солтүстік Африка және Таяу Шығыс елдері) және АҚШ елдерінде ілгерілету бойынша алғашқы қадамдарын жасап үлгерді.

• 13.12.2023
• 160