ҚОСШЫҢЫРАУ АУЫЛДЫҚ ОКРУГІНЕ ТАБИҒИ ГАЗ ҚОСЫЛДЫ

Бүгін облыс әкімі Нұрлыбек Нәлібаев Қызылорда қаласына қарасты Қосшыңырау ауылдық округіне газ қосу рәсіміне қатысты. Жыл қорытындыланатын кезде көл-көсір қуанышқа кенелген ауыл тұрғындарын құттықтап, өңір инфрақұрылымын өркендетуде табысты іске асқан жобалар туралы айтты.

«Облыстың газдандырылған елді мекендерінің аумағы ұлғайып келеді. Қазір барлық аудан орталығы мен 4 қала (Арал, Қызылорда, Байқоңыр, Қазалы), 24 елді мекен табиғи газ пайдаланады. Биыл 12 ауылдық елді мекенге газ кіргізілуде. Күні кеше Шиелі және Жаңақорған аудандарындағы 5 елді мекенге қосылды. Мамыр айында Қызылорда қаласының Ақсуат ауылдық округі газдандырылды. Ал, бүгіннен бастап Қосшыңырау ауылдық округінің тұрғындары «көгілдір отынның» игілігін көрмек. Келер жылға қаралған 4 млрд. теңгеге тағы 12 елді мекенді газбен қамтамасыз етеміз.  2024 жылдың соңында газдандыру деңгейі 78 пайызға жетеді. «Көгілдір отынның»  келуімен ауыл тұрғындарының тұрмыс-тіршілігіндегі кейбір қиындықтар артта қалады деп сенемін», – деді аймақ басшысы.

Ауыл тұрғындарын облыстық ардагерлер кеңесінің төрағасы Серік Дүйсенбаев пен Қосшыңырау ауылдық округінің ардагері Әлихан Смайлов құттықтады.

Іс-шара қонақтары Берік Әбуовтің үйіне табиғи газ қосу сәтіне куә болды.

Айта кетейік, осы ауылдық округті газдандыруға республикалық және жергілікті бюджеттен 662,7 млн.теңге бөлінді, мердігер мекеме – «РемСтрой» ЖШС.

©️Қызылорда облысы әкімінің баспасөз қызметі

• 27.12.2023
• 207