Қазақстан GovTech Prize 2024 сыйлығының жеңімпазы атанды!

GovTech Prize — 2014 жылы бекітілген БАӘ мемлекеттік қызметті жетілдіру бағдарламасының (EGSEP) бастамасы. Бұл бастама өзекті мәселелерді шешетін және халықтың өмір сүру сапасын арттыруда үкіметтік тәжірибені кеңейтетін әлем елдерінің мемлекеттік мекемелерінің инновациялық және шығармашылық шешімдері мен жетістіктерін тануға және мойындауға бағытталған.

«Отбасының цифрлық картасы» жобасы Дубайдағы Дүниежүзілік үкімет саммитінің әлемдік аренасында Инклюзивті цифрлық трансформация санатында үздік деп танылғанын қуана хабарлаймыз! Бұл – мемлекеттік қызметтердің сапасын жақсартуға бағытталған инновациялық шешімдердің мойындалуы.

Отбасының цифрлық картасы – бұл 40-тан астам мемлекеттік дерекқордан азаматтар туралы ақпаратты ескеретін бірегей скорингтік модель. Бұл модель 100-ден астам критерийлерге сүйене отырып, отбасылардың әл-ауқатының санатын анықтауға көмектеседі, сол арқылы оған мұқтаж адамдарға көмек көрсетуге мүмкіндік береді. Бұл – мемлекеттік қызметтерді ұсынудың проактивті тәсілі.

Біздің инновациялық жұмысымыз әлемдік деңгейде танылған, сондай-ақ, біз қоғамымыздың игілігі үшін өз технологиямызды жетілдіруді жалғастыруға дайынбыз. Барлық командаға қажырлы еңбегі үшін ризашылығымызды білдіремін! Бұл – ортақ жетістік, алдағы уақытта мемлекеттік қызметтерді жетілдіру үшін жаңа сын-қатерлер мен мүмкіндіктерді асыға күтеміз.

• 14.02.2024
• 331