Қазақстан Республикасы Ұлттық ғылым академиясының академигі, еңбек сіңген ғылым қайраткері, заң ғылымдарының докторы, профессор С.З.Зимановтың 100 жылдығына арналған халықаралық ғылыми-практикалық конференция өтті

29 қаңтарда Заңнама және құқықтық ақпарат институты Қазақстан Республикасы Әділет министрлігімен бірлесіп онлайн режимде ҚР ҰҒА академигі, Еңбегі сіңген ғылым қайраткері, заң ғылымдарының докторы, профессор Салық Зиманұлы Зимановтың 100 жылдығына арналған «Академик С.З. Зиманов: өнегелі өмірі және ғылыми жетістіктері» атты халықаралық ғылыми-практикалық конференция өткізді.

Іс-шараға Қазақстан Республикасы Парламентінің депутаттары, Қазақстан Республикасы Конституциялық Кеңесінің, Қазақстан Республикасы Жоғарғы Сотының және басқа мемлекеттік органдардың, отандық және шетелдік білім беру және ғылым ұйымдарының өкілдері қатысып, сөз сөйледі.

Отандық заң ғылымының өкілдері, академик С.З. Зимановтың серіктестері мен шәкірттері құқықтық ғылымды қалыптастыру мен дамытудағы, Қазақстанның мемлекеттік-құқықтық жүйесін жетілдірудегі оның идеяларының пайдаланылмаған әлеуетін атап өтті.

Шетелдік қонақтар атынан Ресей Федерациясының Үкіметі жанындағы Заңнама және салыстырмалы құқықтану институтының Жария-құқықтық зерттеулер орталығы меңгерушінің орынбасары, Халықаралық салыстырмалы құқық академиясының корреспондент-мүшесі, Ресей Федерациясының еңбек сіңірген ғылым қайраткері, з.ғ.д., профессор Ю.А. Тихомиров және Новосибирск Мемлекеттік Экономика және Басқару университетінің ғылыми жұмыс және қосымша білім беру бойынша проректор, э.ғ.к. А.А. Макарцев, сондай-ақ Беларусь Республикасы ғылымының өкілдері В.А. Шаршун, С.А. Калинин егемен, тәуелсіз Қазақстан болып қалыптасудағы және заң білімі мен ғылымын дамытудағы С.З. Зимановтың баға жетпес рөлі, сондай-ақ академик С.З. Зимановтың халықаралық беделі туралы айтты.

Пікірталас және пікір алмасу барысында конференция қатысушылары заң ғылымының, ұлттық және халықаралық заңнаманың түрлі салаларындағы ең өзекті теориялық және практикалық сұрақтарды талқылады.

Конференция қорытындысы бойынша «Заңнама және құқықтық ақпарат институтының Жаршысы» журналының арнайы шығарылымын шығару жоспарланып отыр, ол Институттың ресми сайтына (http://www.zqai.kz/ru) орналастырылатын болады.

• 10.02.2021
• 450