Сот сараптамасы орталығы

Қазақстанның Сот сараптамалары орталығы Азияның сот сараптамалары қауымдастығына қабылданды

2019 жылдың 28 ақпанында Азияның сот сараптамалары қауымдастығы (AFSN) директорларының кеңесі Қазақстан Республикасы Әділет министрлігінің Сот сараптамалары орталығын мүшелікке қабылдады. Қазіргі уақытта қауымдастық Қытай, Индия, Малайзия, Сингапур және Вьетнамды қоса алғанда Азияның 16 елі мен аумағының 50-ден артық сот сараптамасы зертханалары мен ұйымдарын біріктіреді. Мүше-ұйымдар ДНҚ, токсикология, есірткі құралдары, компьютерлік сараптама және сапа мен стандарттарды бақылау сияқты салалардағы соңғы әзірленімдерді қарастыра отырып, бірқатар жұмыс топтары мен комитеттер арқылы тәжірибемен және алдыңғы қатарлы практикамен алмасып отырады.

Халықаралық байланыстарға жауап беретін қауымдастықтың директорлар кеңесінің мүшесі, Сингапур Денсаулық сақтау басқармасының сот сараптамасы тобы директорының орынбасары д-р Angeline YAP Tiong Whei: «Мен Қазақстанның AFSN үлкен жанұясына қосылуын қуанышпен қолдаймын және біз бір-бірімізбен тығыз ынтымақтастықта болатынымызға сенімдімін» деп түсіндірме берді.

«Біз, әсіресе қазір, Қазақстанның Әділет министрлігі сот сараптамасы жүйесін реформалауды жалғастырып жатқан кезде, Азияның сот сараптамалары қауымдастығына қосылуға мүмкіндік туғанына өте қуаныштымыз», - деді «Сот сараптамасын нығайту» жобасының басшысы Юрий Бикбаев. «Біз, Сот сараптамалары орталығы, сондай-ақ Қазақстанның әділет секторының мамандары мен практиктері қауымдастықтағы әріптестерімен ой-пікір алмасудан пайда табады деп үміттенеміз» - деп қорытындылады Бикбаев. «Сот сараптамасын нығайту» жобасы қауымдастыққа мүшелікке өту өтініміне қолдау көрсетті және «Сот төрелігі секторын институционалдық нығайту жобасы» аясындағы Әділет министрлігі мен Дүниежүзілік Банктің арасындағы ынтымақтастықтың бір бөлігі болып табылады.

• 03.12.2019
• 556