Әлеуметтік нысандардың жұмысымен танысу

Бүгін Қызылорда қаласындағы бірқатар әлеуметтік нысандардың жұмысымен таныстым.  Алдымен «Nur Otan» партиясы Қызылорда қалалық филиалының жаңа ғимаратының ашылу рәсіміне қатыстым.
Қасиетті Тәуелсіздігіміздің 30 жылдығы қарсаңында «Nur Otan» партиясы Қызылорда қалалық филиалының жаңа ғимаратын салтанатты түрде пайдалануға бердік.
Қазақстан Республикасының Тұңғыш Президенті - Елбасының кемеңгерлігімен «Nur Otan» партиясы еліміздегі ең ірі әрі белсенді партияға айналды.
Партия алғашқы құрылған күннен жігерлі бастамалар көтеріп, халықтың мүддесін жеткізіп, азаматтардың өзекті мәселелерінің шешімін табуға ұйытқы болып келеді.
Бүгін міне 36 бастауыш ұйымы мен 261 партиялық топты, 9 мыңға жуық партия мүшесін бір шаңыраққа жинап отырған қаламыздың саяси жетекші күші жаңа ғимаратқа көшірілуде. Жаңа ғимарат халық игілігіне қызмет ететін болады.

Одан кейін демеушілік арқылы жөндеу жұмыстары жүргізілген «Саңыраулар қазақ қоғамының Қызылорда облыстық филиалы» қоғамдық бірлестігінің жұмысын көрдім.
Аталмыш ғимарат 2000 жылы салынған. Өткен жылы «Саңыраулар қазақ қоғамының» Қызылорда облыстық филиалының әкімшілік ғимаратына демеушілердің көмегімен күрделі жөндеу жұмыстары жүргізілді.
Бұл жерде 12 ымдау тілінің маманымен 120 мүгедекке қызмет көрсетілуде.
Сонымен қатар облыстық филормонияға барып, жұмысымен таныстым.
«Жұмыспен қамтудың 2020-2021 жылдарға арналған жол картасы» аясында жергілікті бюджеттен қаржы бөлініп, 2020 жылдың желтоқсан айында облыстық филармонияның қосымша қосалқы ғимараты пайдалануға берілген. Ұжымның жұмысына сәттілік тілеймін! Өңірдің мәдени саласын дамытуға қызмет ететіндеріне сенемін.

• 11.03.2021
• 286