ҚР Әділет министрі Ерлан Сәрсембаев Бакуде өткен Түркі мемлекеттері Ұйымының Әділет министрлері кеңесінің екінші отырысына қатысты

Кеңеске Әзербайжан Республикасының, Түркия Республикасының, Өзбекстан Республикасының әділет министрлері, Қырғыз Республикасы Әділет министрінің орынбасары, сондай-ақ Түркі мемлекеттері ұйымының Бас хатшысы қатысты.

Кеңес барысында Тараптар 2024 жылғы 9 қыркүйекте Астанада өткен бірінші отырыста қабылданған Астана декларациясының ережелерін іске асыруды талқылап, әділет органдарының қызметін цифрландыру мәселелеріне ерекше назар аударды. Министр өз сөзінде әділет органдарын цифрлық трансформациялау саласындағы әртүрлі бағыттардағы негізгі реформалар туралы айтты.

Екінші Кеңестің қорытындысы бойынша Тараптар Бірлескен коммюникеге қол қойды. Сонымен қатар тараптар Кеңестің кезекті отырысын 2026 жылы Түркия Республикасында өткізуге келісті.

Сондай-ақ Министр Кеңестің екінші отырысы шеңберінде бірқатар екіжақты кездесулер өткізді. Атап айтқанда, Әзербайжан Республикасының Әділет министрі Фарид Ахмедовпен, Түркия Республикасының Әділет министрі Йылмаз Тунчпен және Өзбекстан Республикасының Әділет министрі Акбар Ташкуловпен кездесулері өтті.

Кездесулер барысында тараптар цифрландыру, азаматтық істер бойынша құқықтық көмек, атқарушылық іс жүргізу және сот-сараптамалық қызмет салаларындағы тәжірибе алмасу мәселелерін қоса алғанда, құқықтық саладағы ынтымақтастықтың ағымдағы жай-күйі мен перспективаларын талқылады. Кездесулердің қорытындысы бойынша тараптар өзара мүдделілік пен бауырластық және серіктестік рухында сындарлы диалог пен практикалық өзара іс-қимылды жалғастыруға дайын екендіктерін білдірді.

• 18.12.2025
• 6