ҚР Әділет министрі Ерлан Сәрсембаевтың төрағалығымен Әділет министрлігінің кеңейтілген алқа отырысы өтті

Алқа жұмысына Президент Әкімшілігінің, Парламенттің, Үкіметтің өкілдері, Министрліктің Қоғамдық кеңес мүшелері, сондай-ақ заң қоғамдастығының да өкілдері қатысты.

Отырыста Министрліктің 2025 жылғы қызметінің қорытындылары шығарылып, 2026 жылға арналған негізгі міндеттер айқындалды. Оның ішінде нормашығару сапасын арттыруға, цифрлық шешімдер мен жасанды интеллектті енгізуге, сот-сараптамалық қызметті дамытуға, мәжбүрлеп орындату жүйесін жетілдіруге және заң көмегінің қолжетімділігін қамтамасыз етуге ерекше назар аударылды.

Министр нормативтік құқықтық актілерге сыбайлас жемқорлыққа қарсы сараптаманың сапасын, құқықтық мониторингтің болжамды және аналитикалық құрамдас бөлігін күшейту, сондай-ақ мемлекеттік органдардың заңға тәуелді актілерді дайындау мен қабылдау сатысындағы жауапкершілігін арттыру қажеттігін атап өтті.

Заң қызметтері саласында нотариат пен адвокатураны цифрландыру, мемлекет кепілдік берген заң көмегіне ақы төлеу мөлшері мен механизміне қолданыстағы тәсілдерді және де оның көрсетілу сапасын бағалау жүйесін қайта қарау басым бағыттар ретінде белгіленді.

Сондай-ақ зияткерлік меншік құқықтарын қорғау, авторлық құқықтарды ұжымдық басқаруға арналған бірыңғай цифрлық платформаны іске қосу, сот сараптамасы жүйесін жаңғырту және мәжбүрлеп орындату саласында бақылауды күшейту міндеттері талқыланды.

Алқа барысында барлық реформалардың бастауы адам екені, оның құқықтары мен заңды мүдделерін қорғау, мемлекеттік қызметтердің қолжетімділігі және заң алдындағы теңдігі басты орында екені алға қойылды.
Қорытындылай келе, Министр 2026 жыл Мемлекет басшысы Қасым-Жомарт Кемелұлы Тоқаев ұсынған «Заң мен тәртіп» тұжырымдамасын жүзеге асыруда әділет органдарының рөлін айқындайтын нақты шешімдер мен нәтижелер жылы болуы тиіс екенін атап өтті.

• 26.12.2025
• 4