Қазақстанда электрондық апостиль енгізу туралы

«Әділет органдарынан және өзге де мемлекеттік органдардан, сондай-ақ нотариустардан шығатын ресми құжаттарға апостиль қою» мемлекеттік қызметін автоматтандыру шеңберінде Әділет министрлігі 2021 жылғы қаңтардан бастап Қазақстан Республикасында электрондық апостильдің пилоттық жобасын іске қосты.

Қызметті онлайн алу үшін «электрондық үкімет» порталында авторизациядан өту және «Қызметке онлайн тапсырыс беру» батырмасы бойынша өту қажет. Содан кейін, өтінімді толтырып, оған ЭЦҚ-мен (электрондық цифрлық қолтаңбамен) қол қойылады. Өтінімге апостиль қойылатын құжаттың сканерленген нұсқасын тіркеу қажет. «Электрондық үкіметтің» төлем шлюзінің бетіне «төлеу» батырмасы бойынша өтіп, төлем жүргізіледі.

Төлегеннен соң жеке кабинеттің «қызметті алу тарихы» бөлімінде Сіздің өтініміңіздің өңделгені туралы апостиль электрондық мөртабаны бар электрондық құжат немесе дәлелді бас тарту түрінде хабарлама келіп түседі.

Электрондық апостиль мөртабанының астында электрондық беттің мекенжайына сілтеме көрсетіледі. Шет мемлекеттің уәкілетті органы электрондық апостиль мөртабаны бар электрондық құжатты https://egov.kz/cms/ru/services/apostil/apostil сілтемесі бойынша өтіп тексере алады.

Электрондық қызметті «электрондық үкімет» порталында – «электрондық тіркелімде апостиль мөртабанын тексеру» арқылы да тексеруге болады.

Сонымен қатар, электрондық қызметті алу үшін алдымен шет мемлекетте «апостиль» электрондық мөртабаны бар электрондық құжатты қабылдауы туралы нақтылауды ұсынамыз.

Қызмет Гаага Конвенциясының қатысушысы болып табылатын елдер үшін қол жетімді. Егер ел Гаага Конвенциясының қатысушысы болып табылмаса, құжаттарды заңдастыру үшін Қазақстан Республикасы Сыртқы істер министрлігінің Консулдық қызмет департаментіне жүгіну қажет.

Электронды апостильді енгізген кезден бастап Қазақстанда 741 құжат электронды түрде, 15 248 құжат қағаз түрінде апостильденгенін атап өткен жөн.

• 23.04.2021
• 244