Облыс әкімі Г. Әбдіқалықованың Қазақстан халқының бірлігі мерекесімен құттықтауы

Қымбатты жерлестер!

Сіздерді бірлік пен келісімнің, татулық пен достықтың мейрамы – 1 мамыр – Қазақстан халқының бірлігі мерекесімен шын жүректен құттықтаймын!

Бұл мереке - Отанымызға деген сүйіспеншілік пен қазақстандық патриотизмнің, елге деген адалдық пен азаматтықтың жарқын көрінісі.

Тұңғыш Президентіміз - Елбасы Нұрсұлтан Әбішұлы Назарбаевтың сөзімен айтсақ,  «Мәңгілік елдің алтын діңгегі – береке мен бірлік!»

         Ел бірлігі – асыл сөз. Бірлігі жарасқан елдің тірлігі төрге озады.

         Бүгінгі таңда әлемде болып жатқан жағдайларды сараптай қарасақ, бейбіт өмір мен тыныштықтың қадірі арта түсері анық.

         Осы ретте, көптеген этностың ортақ шаңырағына айналған Қазақ елі бейбітшілік пен келісімді сақтау арқылы әлемге үлгі болып келеді.

         Кешегі кеңестік қуғын-сүргін кезінде көптеген ұлт өкілдері қоныс аударуға мәжбүр болып, Қазақстанды паналады. Қазақ халқы оларды жатсынбай, дархан пейілін көрсетіп, қамқор құшағын айқара ашты, туған үйіндей бола білді.

         Биыл – Тәуелсіздігіміздің 30 жылдығы.

Ел Президенті Қасым-Жомарт Кемелұлы Тоқаев өзінің «Тәуелсіздік бәрінен қымбат» мақаласында «Бүкіл қоғамды ұйыстыратын құндылықтар неғұрлым көп болса, бірлігіміз де соғұрлым бекем болады», - деген еді.  

Осы ретте өңіріміздегі 35 этнос өкілі берекелі бірлік пен қоғамдық келісімнің нығаюына атсалысып, ұлттық, рухани құндылықтар мен салт-дәстүрдің, мәдениеттің сақталуына, мемлекеттік тілдің өркендеуіне зор үлес қосуда.  

Жұдырықтай жұмылған бірлігіміздің арқасында күрделі кезеңдегі қиындықтарды қайыспай көтеріп, қуанышымызды қылдай бөлісіп, ырысты ынтымағымыз бен тату тірлігімізді танытып келеміз.

Қадірлі жерлестер!

Хакім Абайдың «Адамзаттың бәрін сүй, бауырым деп», ұрпағына қалдырған асыл сөзі қазақ халқының ғана емес, бүкіл әлемнің айтып жүрер ұраны болғандай.

Бір-бірімізге деген құрметіміз шынайы, жүрегіміз мейірімді, пейіліміз кең болсын!

Сіздерге денсаулық, ұзақ ғұмыр, отбастарыңызға бақ-береке  тілеймін!

Әрқашан халқымыз аман, еліміз тыныш  болсын!

Тәуелсіз Қазақстанымыз жасай берсін!

• 30.04.2021
• 266