Жаңақорған ауданындағы егіс алқабын аралап, жастар бригадасымен кездестім

Өткен сенбі қуаңшылық жағдайына орай аудандардағы егіс алқаптарының жұмыс барын бағдарлау үшін Жаңақорған ауданына барып, бірқатар нысандарды араладым. Жұмыс сапарым Жаңарық ауылдық округіндегі дәрігерлік амбулаторияның құрылыс барысымен танысудан басталды.

Мұнан кейін Қыркеңсе ауылдық округіндегі жастар бригадасының жұмысымен таныстым. Ауылдық округ бойынша барлығы 3098 малазықтық дақылдары орналастырылды, оның ішінде 750 гектар жаңа жоңышқа, 1816 гектар ескі жоңышқа, 502 гектар күздік бидай мен 30 гектар жаздық бидай егілген. Ал, ескі жоңышқаның бірінші орымынан 5 мың тонна шөп жиналды. Қазіргі таңда «Жасыл ел» жасақ сарбаздары бірігіп Қыркеңсе ауылдық округіне қарасты «Құдірет» шаруа қожалығындағы қалың қамыс шөбін тау беткейінде орналасқан «Ақүйік» ауылдық округінің тұрғындарын жем-шөппен қамтамасыз етуде.

Ауданға іссапарым Бірлік ауылдық округінде жалғасты. Мұнда ауылда салынып жатқан 90 орындық балабақша құрылысымен таныстым. Нысан құрылысы 2022 жылы аяқталады.

Жайылма ауылдық округіндегі егіс алқабына арнайы барып, еңбеккерлермен кездестім. Ауылдық округке қарасты 13 шаруа қожалығы 550 гектар жерге бақша дақылдарын орналастырды. Шаруалар биылғы жылы орын алып жатқан су тапшылығын ескер келе, тау беткеінде орналасқан Жайылма ауылдық округінде шахталық керіздерді қазып, жерасты су қорын пайдаланып, егін көлемін ұлғайтуда.

Сапар соңында су тапшылығына байланысты су ресурстарын тиімді пайдаланып, өсімдік шаруашылықты әртараптандыру және жергілікті тауарөндірушілерді қолдау жұмыстарына ерекше назар аударуды  жүктедім.

• 12.07.2021
• 257