Сенбі күні Қостанайда іссапарда болдым.

Сенбі күні Қостанайда іссапарда болдым.

1. Алдымен орталық ХҚКО-ға бардым. Жалпы алғанда, жұмыс барысы қалыпты. Алайда облыс орталығындағы фронт-офис үшін кеңірек ғимарат керек деген ой келді, себебі клиенттер кезегін далада күтуге мәжбүр. Бұл мәселені облыс әкімі Архимед Бегежанұлымен бірге шешуіміз керек. Е-Otinish жүйесі арқылы қатардағы азамат ретінде өтінім жолдап көрдім. Жүйені жетілдіру жұмыстарын жалғастырамыз, жаңа ӘРПК бойынша кейбір мәселелер қаперге алынбаған екен;

2. 109 қызметінің жұмысымен таныстым (астанадағы i-Komek сияқты). Жас ұжым бұл жобаға жаны ашып, барынша дамытуға тырысып жатқандығын байқадым. Бірақ заман талабына сай жұмыс істеп, халыққа қолайлы қызмет көрсету үшін әкімдік 112 жобасын іске асырып (102 және 103 қызметтерін біріктіру арқылы), тұрғын үй-коммуналдық шаруашылығы бойынша қызмет көрсету орталығын ұйымдастыруы қажет.

3. Қалалық су арнасындағы цифрландыру үрдісімен таныстым. Арнайы орнатылған құрылғылар арқылы әр литр су, сондай-ақ қаланың барлық сорғы станциялары мен тораптары туралы ақпарат алуға болады екен. Бұл - құптарлық және қуантарлық жайт. Енді тұрғын үйлерге құрылғылар орнатылса болды. «Судың да сұрауы бар» деген сөздің мәні өскен қазіргі заман үшін бұл аса маңызды мәселе.

Облыстағы ірі кәсіп – ОлжаАгроның жұмысын өз көзіммен көру де мен үшін қызық болды.

Айдарбек агрономдарға арналған қосымшаны қалай пайдаланатындарын, жер қорын цифрландыру барысын және компаниядағы үрдіс ретін көрсетті. Жарты күн бойы жүзеге асырылып жатқан инновациялармен таныстық. Егер еліміздің агроұйымдары осы ОлжаАгро енгізген процеспен жұмыс істесе, ауыл шаруашылығының тиімділігі біршама жоғары болар еді.

Бұл іссапардан нендей ой түйдім?

А) біз әр адым жерді цифрландыру және хаттау ісін барынша және жаппай жеделдету керекпіз;

Ә) жеке монополиялардың алдын алу үшін Қолдау ақпараттық жүйесі бәсекелестік ортада дамуы тиіс. Бұл туралы Президент те бірнеше рет айтқан болатын;

Б) субсидиялау үрдісін қайта қарастыру қажет. Қаражаттандыру процесі ұсынылған мәліметтер емес, скоринг үлгісі негізінде жүргізілуі керек. Әсіресе бұл үрдісте «тетікті алғашқы боп кім басса» деген ұғым тіпті болмауы тиіс;

Г) тыңайтқыштар мен т.б. сатып алуды қаражаттандыру кезінде жерге егжей-тегжейлі агрохимсараптама жасау идеясын насихаттау қажет. Себебі емдеу және дәрі-дәрмек жазып беру үшін алдымен нақты диагноз қою керек.

Әкім және Айдарбекпен мынадай келісімге келдік: ОлжаАгро базасында жергілікті инновациялық Хаб ұйымдастырамыз (АстанаХаб сияқты). Бірақ бұл ауыл шаруашылыққа негізделеді, сондықтан оны Цифрлық деп емес инновациялық деп атайтын болдық. Бизнестер мен стартаптар міндетті түрде цифраға негізделуі тиіс емес қой.

• 21.07.2021
• 377