Мемлекет басшысы өз жолдауында мектепке дейінгі білім сапасын көтеру мәселесіне жіті көңіл бөліп, адамның ойлау қабілеті, шығармашылық қасиеттері мен дағдылары бүлдіршін кезінен қалыптасатынын тілге тиек етті.

Мемлекет басшысы өз жолдауында мектепке дейінгі білім сапасын көтеру мәселесіне жіті көңіл бөліп, адамның ойлау қабілеті, шығармашылық қасиеттері мен дағдылары бүлдіршін кезінен қалыптасатынын тілге тиек етті. Осы орайда Аружан Саин мен Мәдениет және спорт министрлігінің ортақ жобасы - "Бала" ақпараттық жүйесі жасалды.

Осыдан бірнеше ай бұрын Цифрлық трансформация орталығы (ЦТО) "Бала" АЖ үрдісін реттеп, artsport.edu.kz платформасына енгізу жұмысын бастаған болатын. Бұл іске Сергей Алабугин де белсене араласып, жүйені әрі қарай жандандыруға үн қосты.

Біз бұл орталықты мемлекеттік органдарға ағымдағы процесстерді цифрлық заманға бейімдеп, азаматтарға қолайлырақ етуге көмектесу үшін құрған едік. Жұмыла жасалған көптеген жобалардың ішінде осы "Бала" жүйесі де бар.

Бұл жобаның пайдасы қандай? Енді ата-аналар үйінің/жұмысының/мектептің қасындағы үйірме мен секцияларды таңдай алады. Балалар өз құрбы-құрдастарымен бірге сүйікті істерімен шұғылданып, жаттықтырушылар мен педагогтардың қарамағында уақыттарын тиімді және пайдалы өткізе алады.

Сәуірдің аяғынан бері жүйеге 112 472 қолданушы тіркелген, соның ішінде 1 928 қызмет ұсынушы, 3 759 жаттықтырушы, 11 739 бала бар.

Осындай жобалардың арқасында балалар өз болашақтарын жарқын етер жақсы таңдау жасап, спорт және өнерде өзіндік орындарын тауып, алдағы уақытта олимпиада және әлем чемпиондарына, үлкен сахнаның жұлдызына айналарына сенім артамыз.

• 10.09.2021
• 293